गुल्मीमा पहिरोले घर पुरिदा एकै परिवारका चार जनाको मृत्यु

१६ साउन, गुल्मी । शुक्रबार गुल्मीको रुरु गाउँपालिकामा पहिरोमा पुरिएर एकै घरका चार जनाको ज्यान गएको छ । रुरू गाउँपालिका वडा नम्बर ५ आँटिपाटामा पहिरोले घर पुरिदा एकै घरका चार जनाको ज्यान गएको हो । ज्यान गुमाउनेमा तीन बालबालिका पनि छन् ।

शुक्रबार बेलूकी घरमाथिबाट झरेको ढुंगासहितको ठूलो पहिरोले घर पुरिदा स्थानीय बिना माझीसहित उनका तीन छोराछोरीको ज्यान गएको प्रहरीले जनाएको छ । पहिरो गएको केही घण्टामै पहिरोबाट बिनाको शब निकालिएको छ । उनका छोराछोरीको भने शब खोज्ने क्रम जारी छ ।

बिनाका श्रीमान राजु भने रोजगारीका लागि भारत गएका छन् । शुक्रबार बेलुकीदेखि आएको बर्षाले घरमाथिबाट पहिरो खस्दा आमासहित चार जनाको एकै चिहान भएको हो ।