नेपाली कांग्रेस बीपीमा २ सय जना युवा प्रवेश

१७ साउन, काठमाडौं । नेपाली कांग्रेस बीपीमा २०० बढी युवाहरु प्रवेश गरेका छ्न । कांग्रेस बीपीले काठमाडौ क्षेत्र नम्बर ९ कलंकीमा आफ्नो क्षेत्रीय कार्यालय स्थापना तथा २०० जना युवाहरुलाई पार्टी प्रवेश गराएको हो । क्षेत्र नम्बर ९ का सभापति प्रभाकर महर्जनको सभापतित्व र नेपाली कांग्रेस बीपीका सभापति हरिबोल भट्टराईको प्रमुख आतिथ्यतामा २०० बढी युवाहरुलाई पार्टी प्रवेश गराइएको हो ।

कार्यक्रममा कांग्रेस बीपीका महामन्त्री तथा पुर्वमन्त्री सुशीलमान शेरचन, महामन्त्री पुष्पराज पराजुली, सह महामन्त्री तथा प्रवक्ता देवेन्द्र प्रकाश लगायतको उपस्थिती थियो । कार्यक्रमलाई सम्बोधन गर्दै सभापति भट्टराईले नेकपा सत्ताको लागि विदेशीसित लम्पसार परेको बताए । यसरी विदेशीसँग नेकपासँगै नेपाली कांग्रेस समेत मिलेको उनले बताए । कोरोनाको नाममा सरकारले ठूलो भ्रष्टाचार गरेको उनको आरोप छ ।

सरकारले आफ्नो जिम्मेवारी भुल्दै गएको बेला युवाहरुले इनफ इज इनफ अभियान थाल्नु सकारात्मक रहेको र युवाहरुको मागमा आफ्नो समर्थन रहेको बताए । नेपाली कांग्रेस बीपीका महामन्त्री सुशीलमान शेरचनले सरकारले कोरोनाको नाममा १० अर्ब खर्च देखाएपनि फ्रण्ट लाईनमा खटिने स्वास्थकर्मी, पत्रकार, सुरक्षाकर्मीलाई पीपीई, सेनिटाइजर समेत उपलब्ध नगराइएको बताए ।

नागरिकको पीसीआर परीक्षणमा तिव्रता दिन नसक्ने सरकारले १० अर्वको हिसाब देखाउनु लज्जास्पद भएको उनले बताए । सत्तापक्ष र प्रतिपक्षी दल भ्रष्टाचारमा लिप्त भएकाले अब यस्ता प्रवृत्तिविरुद्ध ठूलो आन्दोलन आवश्यक रहेको उनले बताए ।

यसका लागि ललितपुरको पाटन कृष्ण मन्दिर र भक्तपुरमा कोणसभा गरेपछि काठमाडौमा मसाल जूलूस र माइतीघरमा विशाल विरोध सभाका साथै राष्ट्रिय आन्दोलन घोषणा गर्ने उनले बताए । कार्यक्रममा युवा, पार्टी कार्यकर्ताहरुको सक्रिय सहभागिता थियो ।