भोलिदेखि धनुषामा पनि निषेधाज्ञा !

१८ साउन, धनुषा । वीरगञ्जमा अवस्था भयावह भएपछि धनुषामा पनि सतर्कता अपनाउन शुरु गरिएको छ । जनकपुरधाम उपमहानगरपालिकाले भोलि रातीदेखि लागु हुने गरी निषेधाज्ञा जारी गरेको छ ।

आइतबार बसेको जिल्ला सुरक्षा समितिको बैठकले जनकपुरधाममा सोमबार राति १२ बजेदेखि लागू हुने गरी एक सातासम्मका लागि निषेधाज्ञा जारी गर्ने निर्णय गरेको हो ।प्रमुख जिल्ला अधिकारी प्रेमप्रसाद भट्टराईका अनुसार जनकपुरधाम उपमहानगरपालिकाका साथै उत्तरमा महेन्द्रनगर नजिकको औरही पुलसम्म निषेधाज्ञा जारी गरिनेछ ।

निषेधाज्ञाको समयमा अति आवश्यक कामबाहेक सबैलाई घरभित्र बस्न आग्रह पनि गरिएको छ । प्रदेश २ मा कोरोना भाइरसको संक्रमण तिब्र रुपमा फैलिनुका साथै केहीको ज्यान जान थालेपछि निषेधाज्ञा जारी गरिएको हो ।