प्रदेश २ का मन्त्रीलाई संक्रमण, प्रदेश १ का मन्त्री आइसोलेसनमा !

२२ साउन, काठमाडौं । प्रदेश नं १ का आन्तरिक मामिला तथा कानूनमन्त्री हिक्मतकुमार कार्की होम आइसोलेशनमा बसेका छन् । केही दिनअघि बालुवाटारमा प्रधानमन्त्री केपी शर्मा ओली, गृहमन्त्री रामबहादुर थापा बादल सातै प्रदेशका आन्तरिक मामिला मन्त्रीको छलफल थियो ।

प्रदेश प्रहरी विधेयक पारित भइसकेपछि प्रदेशमा प्रहरी समायोजन सम्बन्धमा भएको छलफलमा सात वटै प्रदेशका आन्तरिक मामिला तथा कानूनमन्त्री सहभागी रहेका प्रदेश नं. २ का आन्तरिक मामिलामन्त्री ज्ञानेन्द्र यादवलाई कोरोना सङ्क्रमण पुष्टि भयो ।

मन्त्री यादवलाई कोरोना पुष्टि भएपछि प्रदेश १ का आन्तरिक मामिलामन्त्री कार्की आइसोलेशनमा बसेका हुन् । मन्त्री कार्कीले आफूहरुसँग प्रत्यक्ष सम्पर्कमा रहेका सबैलाई स्वाब परीक्षण गर्न आग्रह गरेका छन् ।

यसका लागि मन्त्री निवास र सम्पर्कमा आएका सबैको कोरोना परीक्षण गर्ने तयारी छ । तर मन्त्री यादवसँग प्रत्यक्ष हेलमेल भएका अरु मन्त्री, गृहमन्त्री बादल र प्रधानमन्त्री ओली भने अहिलेसम्म चुप छन् ।