फेरि लकडाउन नहुने पक्का : उडान, स्कूल र गाडी खुल्ने सम्भावना न्युन !

२२ साउन, काठमाडौं । कोरोना संक्रमित र मृत्तकको संख्या बढ्दै गएपनि नेपालमा फेरि लकडाउन नहुने पक्का भएको छ । कोरोना रोकथामका लागि सबै उपाय अपनाउने भएपनि फेरि लकडाउन गर्नेबारे अहिलेसम्म नसोचिएको सरकारका प्रवक्ताले स्पष्ट पारेका छन् ।

मन्त्रिपरिषद्को निर्णय सार्वजनिक गर्न बिहीबार सिंहदरबारमा आयोजित पत्रकार सम्मेलनमा अर्थ, सञ्चार तथा सुचना प्रविधिमन्त्री एवं सरकारका प्रवक्ता युवराज खतिवडाले फेरि देशव्यापारी लकडाउन नहुने बताएका हुन् ।

यसबारेमा अहिलेसम्म सरकारले नसोचेको र लकडाउन कोरोना महामारी रोकथामको समाधान नभएको पनि मन्त्री खतिवडाले बताए । जिल्ला प्रशासन कार्यालयले निषेधाज्ञा जारी गर्ने अधिकार खुल्ला रहेको भन्दै मन्त्री खतिवडाले लकडाउनबारे अन्योल नराख्न आग्रह गरे ।

यद्यपी कोरोना संक्रमणको जोखिम नभएको ठाउँमा खुकुलो र संक्रमण भएको ठाउँमा केही कडा गर्ने नीति सरकारले अघि सारेको पनि उनले बताए । संक्रमितको संख्या बढेकाले अहिलेकै अवस्थामा अन्तराष्ट्रिय उडान, स्कुल र लामो दुरीका गाडी खोल्ने सम्भावना कम हुदै गएको पनि मन्त्री खतिवडाको भनाई छ ।

सरकारले यसअघि नै भदौबाट अन्तराष्ट्रिय उडान, लामो दुरीका गाडी र स्कुल खोल्ने निर्णय गरिसकेको छ । तर संक्रमितको संख्या बढेपछि यो निर्णयमा सरकारले पुनर्बिचार गर्न सक्ने मन्त्री खतिवडाले बताएका छन् ।