काठमाडौंका स्थानीय तह तीन हप्ता बन्द

२६ साउन, काठमाडौं । कोरोना महामारीको जोखिम र त्रास बढ्दै गएपछि काठमाडौं उपत्यकाका सबै स्थानीय तहबाट प्रभावित हुने सेवा तीन हप्ताका लागि बन्द गरिएको छ । उपत्यकाका स्थानीय तहका प्रमुख एवं मेयरहरुको संगठन ‘नगरपालिका मेयर फोरम’को आज बसेको बैठकले तीन हप्ताका लागि सेवा बन्द गर्ने निर्णय गरेको हो ।

काठमाडौं कोरोनाको उच्च जोखिममा परेकाले स्थानीय तहको सेवा बन्द गर्न लागिएको मेयरहरुले बताएका छन् । आज बसेको बैठकले उपत्यकाभित्र समुदायस्तरमा संक्रमणको उच्च जोखिम देखिएकोले भिडभाड कम गर्न अत्यावश्यकबाहेकका सबै सेवा बन्द गर्ने निर्णय गरिएको मध्यपुर थिमी नगरपालिकाका मेयर मदनकृष्ण श्रेष्ठले बताए ।

साथै मेयरहरुको बैठकले सार्वजनिक गाडी १५ दिनका लागि रोक गर्न माग समेत गरेको छ । अरु खोलेपनि सार्वजनिक गाडी १५ दिनका लागि बन्द गराउन मन्त्रिपरिषद बैठकमा प्रस्ताव लैजाने निर्णय भएको उनले बताए । पछिल्लो समय काठमाडौंमा दैनिक संक्रमितको मृत्यु हुन थालेको छ भने नयाँ संक्रमितको संख्या पनि बढ्दै गएको छ ।