आन्तरिक उडान र लामो दुरीका गाडी अब भदौ १६ देखि खुल्ने

२६ साउन, काठमाडौं । कोरोना भाइरसको संक्रमण भयावह हुन थालेपछि सरकारले भदौ १६ गतेदेखि मात्रै आन्तरिक उडान र लामो दुरीका गाडी खोल्ने निर्णय गरेको छ । यसअघि भदौ १ गतेदेखि खोल्ने भनिएको सार्वजनिक यातायात र उडान अब भदौ १६ देखि मात्रै खुल्ने भएका हुन् ।

मन्त्रिपरिषदको सोमबार बसेको बैठकले कोभिड—१९ संकट व्यवस्थापन सेन्टर सीसीएमसीको सिफारिसलाई सदर गर्दै भदौ १६ गतेबाट निर्णय कार्यान्वयन गर्ने भएको हो ।

५ साउनमा बसेको मन्त्रिपरिषद् बैठकले चार महिना लामो लकडाउन अन्त्य गर्दै अन्तर जिल्ला यातायात, बाह्य तथा अन्तरिक हवाई उडान तथा विद्यालय भर्ना लगायतका गतिविधि भदौ १ गतेदेखि निर्णय गरेको थियो ।

तर कोरोना भाइरस कोभिड–१९ को संक्रमणको जोखिम बढेको भन्दै सीसीएमसीले तत्काल लामो दुरीका गाडी र हवाई उडान खोल्न नसकिने निर्णय गरेको थियो । साथै सरकारले सीमामा थप कडाई गर्ने निर्णय पनि गरेको छ ।

तत्कालका लागि अन्तराष्ट्रिय उडान भने स्थगित हुने भएको छ ।