ओली र मोदीबीच टेलिफोन वार्ता

३१ साउन, काठमाडौं । चार महिनापछि प्रधानमन्त्री केपी शर्मा ओली र भारतीय समकक्षी नरेन्द्र मोदीबीच टेलिफोन वार्ता भएको छ । भारतको ७४ औं स्वतन्त्रता दिवसका अवसरमा प्रधानमन्त्री ओली र समकक्षी मोदीबीच टेलिफोन कुराकानी भएको हो ।

प्रधानमन्त्रीद्धयबीच सीमा, कोरोना भाइरसको नियन्त्रण लगायतका विषयमा छलफल भएको परराष्ट्र मन्त्रालयले जारी गरेको विज्ञप्तीमा उल्लेख छ । प्रधानमन्त्रीबीच टेलिफोन संवाद भएको विषयमा दुवै देशका परराष्ट्र मन्त्रालयले विज्ञप्ती निकालेका छन् ।

प्रधानमन्त्री ओलीले भारतसँग नेपालले अर्थपूर्ण सहकार्यको अपेक्षा गरेको मोदीलाई उल्लेख गरेका छन् । ‘प्रधानमन्त्रीले भारतसँग अर्थपूर्ण द्धिपक्षीय सहकार्यको अपेक्षा व्यक्त गर्नुभयो । उहाँहरुबीच द्धिपक्षीय मामिलाहरुमा भविश्यमा निरन्तर छलफल गर्ने सहमति भएको छ’ मन्त्रालयले जारी गरेको विज्ञप्तीमा उल्लेख छ ।

पछिल्लो समय नेपालले कालापानी, लिपुलेक र लिम्पियाधुरासहितको नक्सा जारी गरेपछि भारत रुष्ट बनेको थियो । त्यसयता दुई देशका प्रमुखबीच खासै कुराकानी हुन सकेको थिएन ।