बाढीले जाजरकोटमा वडा कार्यालय बगायो

३ भदौ, जाजरकोट । बाढीले गर्दा जाजरकोटको शिवालय गाउँपालिका वडा नम्बर ६ को वडा कार्यालय भवन बगाएको छ । जाँत खोलामा आएको बाढीले टुनीबगरमा रहेको वडा कार्यालयको भवन र खोलामा हालेको पुल बगाएको हो ।

वडा अध्यक्ष भक्तबहादुर थापाका अनुसार बाढीले भवन आधा बगाएपछि बचेका सामाना सार्ने काम भइरहेको छ । खोला छेउमै राखिएको वडा कार्यालयमा बाढीले ठूलो क्षति भएपछि कार्यालयमा रहेका महत्वपूर्ण कागजात पनि हराएको आशंका छ ।

यस्तै भारी बर्षापछि आएको बाढीले वडा नम्बर ६ कै लोतपाखा, रिसिना, धिरपना, टोटापोखरा, पाल्तका झण्डै दुई सय घर जोखिममा परेका छन् ।