विदेशमा अलपत्र नेपालीलाई भोलिदेखि स्वदेश आउन दिइने

८ भदौ, काठमाडौं । कोरोनाका कारण विदेशमा अलपत्र रहेका नेपालीलाई भोलिदेखि स्वदेश आउन दिइने भएको छ । यसअघि होटेल क्वारेन्टाइनको व्यवस्थापन हुन नसकेको भन्दै कोभिड १९ संकट व्यवस्थापन केन्द्रको निर्देशनमा गत सोमबारदेखि अकस्मात नेपाल आउन रोकिएको थियो ।

गत साता दुवईबाट नेपाल आउन आतुर नेपालीहरुलाई लिन गएको नेपाल वायुसेवा निगमको जहाज स्वदेश आउने आशामा दुवई विमानस्थलमा बसिरहे पनि रित्तै फर्काईएको थियो । संस्कृति, पर्यटन तथा नागरिक उड्डयन मन्त्रालयले भोलिदेखि उद्धार उडान शुरु दावी  गरेपनि आफैमा हास्याँस्पद रहेको छ । किनभने नेपाल आउने सबै यात्रुहरुले आफ्नै खर्चमा टिकट, पीसीआर परीक्षण , होटल क्वारेन्टाइन आदिको व्यवस्था गर्नुपर्ने हुन्छ । नेपाल सरकारको यसमा कुनै जिम्मेवारी र भुमिका देखिएको छैन् ।

बुधबार इत्तिहाद एयरले आवुधाबी र फ्लाई दुबईले दुबईबाट यात्रु ल्याउनेछ । नेपाली कम्पनीको उडान तालिका भने बिहीबार मात्र छ । यो दिन नेपाल एयरलाइन्सले रियाद र हिमालय एयरलाइन्सले दमामबाट यात्रु ल्याउने छ । सोही दिन यूरोप र अमेरिकाका यात्रुलाई टर्किस एयरले बोकेर काठमाडौं ल्याउने गरी तालिका तय गरिएको छ । सरकारले १६ भदौबाट भने नियमित उडान गर्ने निर्णय गरिसकेको छ ।

अब नेपाल आउने सबै यात्रुको अनिवार्य पीसीआर रिर्पोट हुनुपर्नेछ । पीसीआर नभएका यात्रु ल्याएमा उनीहरुलाई क्वारेन्टाइनमा राखेको खर्च एयरलाइन्सले नै व्यहोर्नुपर्नेछ । वायुसेवा कम्पनीले विदेशस्थित नेपाली कूटनीतिक नियोगसँगको सहकार्यमा मात्र यात्रु ल्याउन पाउने छन् । नेपाल आइसकेपछि अब सबै यात्रु अनिवार्य ७ दिन होटेल क्वारेन्टाइनमा बस्नु पर्नेछ ।

साथै सरकारले एक दिनमा ५०० यात्रु मात्रै ल्याउन पाइने नियम बनाएको छ । यसले विदेशबाट आउने टर्किस र कतार एयरले एक उडानमा एकसय जना मात्रै ल्याउन पाउनेछन् ।