डा. गोविन्द केसीको अनशन फेरि स्थगित

११ भदौ, काठमाडौं । डा. गोविन्द केसीले अनशन फेरि स्थगित गरेका छन् । जुम्लामा रहेका केसीले कोरोना महामारीको कारण देखाउँदै अनशन एक साता पछि सार्ने निर्णय गरेका हुन् ।

उनले सरकारलाई दिएको अन्तिम अल्टिमेटम बुधबार सकिएको थियो । बिहीबार बिहान प्रमुख जिल्ला अधिकारी र प्रहरी प्रमुख गएर आग्रह गरेपछि केसीले थप एक हप्तापछि अनशन थाल्ने बताएका हुन् ।

डा.केसीले आफूलाई जुम्ला प्रहरीले दुःख दिन थालेको पनि बताएका छन् । आफ्नो ठाउँमा आउन कसैलाई पनि नदिने, अरु आएपनि बस्न नदिने प्रहरीको हस्तक्षेपविरुद्ध अनशन बस्ने उनको चेतावनी छ ।

केसीले साउन ११ गते चार बुँदे मागसहित सरकारलाई तीन साताको अल्टिमेटम दिएका थिए । यसबीचमा ती माग पूरा गर्न कुनै चासो नदेखाएर सरकारले आफ्नो दम्भ र चरम गैरजिम्मेवारपन प्रदर्शन गरेको उनको आरोप छ ।

यी हुन् डा.केसीका माग

१. कर्णाली स्वास्थ्य विज्ञान प्रतिष्ठानमा तत्काल पूर्वाधार र जनशक्ति पुर्‍याएर एमबीबीएस लगायतका कार्यक्रमहरु सञ्चालन गरियोस् । प्रधानमन्त्रीले नाजायज रुपमा रोकिराखेको उक्त प्रतिस्ठानको स्नातकोत्तर तहको अनुमति तत्काल प्रदान गरियोस् । गेटा मेडिकल कलेज र राप्ति स्वास्थ्य विज्ञान प्रतिष्ठानमा शीघ्र पूर्वाधार र जनशक्ति पुर्‍याएर पठन पाठन सुरू गरियोस्। प्रदेश नम्बर दुई र गण्डकी प्रदेश तथा डोटी वा डडेल्धुरा, उदयपुर र इलाम वा पाँचथरमा सरकारी मेडिकल कलेज खोल्ने प्रक्रिया अघि बढाइयोस्।

२. हामीसँग २०७५ साउन १० गते भएको सम्झौताअनुसार चिकित्सा शिक्षा ऐनमा संशोधन गरियोस्। चिकित्सा शिक्षा नियमावली सच्याउँदै स्नातकोत्तर तहमा खुलातर्फ ७० प्रतिशत सिट कायम गरियोस्।

३. त्रिवि चिकित्साशास्त्र अध्ययन संस्थानमा वरिष्ठता मिचेर भएको नियुक्ति सच्याउँदै सबै पदमा वरिष्ठताका आधारमा नियुक्ति गरियोस्। विश्वविद्यालय, काउन्सिल र प्रतिस्ठानहरुमा पदाधिकारी नियुक्तिका लागि पदाधिकारी मापदण्ड निर्धारण समितिले दिएको सुझाब अनुरूप निष्पक्ष र पारदर्शी ढङ्गले पदाधिकारी नियुक्त गर्ने कानूनी व्यवस्था गरियोस् ।

४. बयलपाटा अस्पताललाई नियमित आवश्यक बजेटको व्यवस्था गरी दिगो निःशुल्क सेवा सुनिश्चित गरियोस्।