नेकपाको भोलि बस्ने सचिवालय बैठक स्थगित

१२ भदौ, काठमाडौँ । सत्तारुढ नेकपाको सचिवलाय बैठक स्थगित भएको छ । भोलि बिहान बस्ने भनिएको नेकपाको सचिवालय बैठक स्थगित भएको हो । यसले नेकपाभित्रको आन्तरिक किचलो मिलि नसकेको संकेत गरेको छ ।

शुक्रबार पार्टी अध्यक्षद्वय केपी शर्मा ओली र पुष्पकमल दाहालबीच बालुवाटारमा छलफल भएपछि बैठक स्थगित गरिएको हो । भोलि बस्ने बैठक भदौ १८ गतेका लागि सारिएको छ ।

कोरोना संक्रमण बढेका कारण बैठक स्थगित भएको नेताहरुको दाबी छ । बैठकमा विवाद समाधानका लागि कार्यदलले बुझाएको प्रतिवेदनमाथि छलफल गर्ने कार्यसूची थियो ।

मन्त्रिपरिषद फेरबदलमा भागबण्डा नमिलेकाले बैठक स्थगित भएको अनुमान छ । कार्यदलले यसअघिकै सहमतिलाई थप परिमार्जित गरेर बुझाएको प्रतिवेदनमा विवाद समाधानका लागि तत्काल मन्त्री फेर्नुपर्ने प्रस्ताव गरेको थियो ।