रुपन्देहीमा थप एक जना संक्रमित महिलाको मृत्यु

१५ भदौ, बुटवल । रुपन्देहीमा थप एकजना कोरोना संक्रमित महिलाको मृत्यु भएको छ । तिलोत्तमा नगरपालिका वडा नंं ५ की ६८ वर्षीया महिलाको आइतबार राति ९ बजे मृत्यु भएको हो ।

कोरोना संक्रमणपछि होम आइसोलेसनमा बसेकी महिलाको आइतबार साँझ अस्पताल लैजाने क्रममा बाटोमै मृत्यु भएको बताइएकाे छ । भदौ ११ गते कोरोना पोजेटिभ रिपोर्ट आएकी ती महिलाको स्वास्थ्यमा समस्या आएपछि भैरहवाको भीम अस्पतालमा लैजाने क्रममा बाटोमै मृत्यु भएको तिलोत्तमा नगरपाकिलाका प्रमुख बासुदेव घिमिरेले जानकारी दिए ।

मृतक सुगर र प्रेसरकी बिरामी थिइन् । अहिले शव भीम अस्पतालमै छ । उनलाई भदौ ११ गते संक्रमण देखिएको थियो । मृतकका घरमा उनीबाहेक अरुमा संक्रमित छैनन् । तिलोत्तमामा कोरोना संक्रमणबाट मर्नेको संख्या ३ पुगेको छ। यस नगरमा कोरोनाबाट संक्रमण हुनेको संख्या १ सय ४४ पुगेको छ । त्यसमध्ये ४४ जना उपचारको क्रममा छन्।