सुन तस्करीको अभियोगमा अष्टमंगल र लक्की ज्वेलर्स प्रहरी अनुसन्धानमा

१६ भदौ, काठमाडौं । सनम शाक्य हत्याकाण्डबाट प्रष्फुटन भएको ३३ केजी गोरे सुन तस्करी प्रकरणमा हल्ला मात्र बढी गराएर अनुसन्धान नै कता मोडियो कता ? उल्टो अनुसन्धानमा संलग्न प्रहरी नै मुद्धा मामिलामा मुछिए ।

तर, केही समय अघि दरवारमार्गमा घटेको आधा केजी सक्कली र साढे चौध केजी नक्कली सुन अवैध रुपमा ओसारपसार प्रकरण भने “भुसको आगो” जस्तै भित्रभित्रै दन्कीरहेको अवस्थामा छ । उक्त प्रकरण बारे गोप्य ढंगबाट अनुसन्धान भइरहेको र संलग्नहरु धमाधम पक्राउ पर्ने क्रम जारी छ ।

यसै क्रममा पछिल्लो पटक अष्टमंगल ज्वेलर्सका विजय ताम्राकार एवम् लक्की ज्वेलर्सका कामदार पक्राउ परेका छन् ।दरवारमार्ग प्रहरीले उक्त प्रकरणमा आधा केजी सुन लक्की ज्वेलर्सबाट खरिद गरिएको अभियुक्तको वयानका आधारमा अघिल्लो दिन उक्त ज्वेलर्सका मालिक ऋषि ठाकुरलाई पक्राउ गरेता पनि त्यसदिन भोलिपल्ट उपस्थित हुने गरी छाडिएकोमा भोलिपल्ट पसलमा काम गर्ने कामदारमाथि म्याद थप गरी हिरासतमा राखिएको छ भने मालिक ठाकुरलाई अहिलेको लागि उन्मुक्ति दिइएको छ ।

प्रहरी स्रोतका अनुसार अवैद्यरुपमा ओसोरपसार भइरहेको उक्त सुन प्रकरणमा लक्की ज्वेलर्सलाई अष्टमंगल ज्वेलर्सले आधा केजी सुन विक्री गरेको बताइएको छ । अष्टमंगल ज्वेलर्सले उक्त सुन बैंकबाट खरिद गरिएको दावी गरेता पनि लक्की ज्वेलर्सलाई विल भर्पाई विनै विक्री गरेका कारण अनुसन्धानको दायरामा तानिएको हो ।

यसअघि, उक्त प्रकरणमा मुछिएका दरवारमार्ग प्रहरी वृत्तका दुई प्रहरी जवान, र प्रत्यक्ष-अप्रत्यक्ष सुन ओसारपसारमा संलग्न थप आधा दर्जन बढी पक्राउ परेका थिए भने सुन तस्करी हुँदैछ भन्ने सुचना पाएर पनि प्रहरी परिचालनमा कमजोर व्यवस्थापन एवम् गलत सूचना दिएको आरोपमा वृत्तका डीएसपी रञ्जन दाहाल हालका लागि प्रहरी तालिम केन्द्र, महाराजगन्ज तानिएका छन् । यद्यपि, मिलोमतो अभियोगमा उनीमाथि पनि थप कारवाही हुन सक्ने बुझिएको छ ।