काठ ओसार्न लागेको समूह र प्रहरीबीच झडप हुँदा ५ जना घाइते

२२ भदौ, धनुषा । धनुषाको बटेश्वर गाउँपालिकामा काठ ओसार्न लागेको समूह र प्रहरीबीच झडप हुँदा ५ जना घाइते भएका छन् । प्रहरीका अनुसार, आइतबार राति १२ बजेतिर काठ ओसार/पसारको विषयमा झडप हुँदा दुई प्रहरी र तीन जना स्थानीय घाइते भएका हुन् ।

बटेश्वर गाउँपालिका– ५ शान्तिपुरमा काठ ओसारिरहेको सूचना पाएपछि पुगेको इलाका प्रहरी कार्यालय महेन्द्रनगरको प्रहरी टोली र स्थानियबीच झडप भएको हो । जिल्ला प्रहरी कार्यालयका अनुसार, प्रहरीले ट्याक्टरमा सखुवाको काठ लोड गरी लैजाँदै गरेको अवस्थामा नियन्त्रणमा लिएर कार्यालय तर्फ लैजादै गर्दा ६०र७० जनाको समूहमा आएका स्थानियसँग झडप भएको हो ।

ट्याक्टरमा लोड गरिएको सखुवाको ८ थान गोलिया काठ नियन्त्रणमा लिई आवश्यक कारवाहीको लागि इलाका प्रहरी कार्यालय महेन्द्रनगरमा राखिएको र फरार भएका चालकको खोजी भइरहेको प्रहरीले जनाएको छ ।