को बन्ला नुवाकोट कांग्रेसको आगामी सभापति ?

♦ मधुकर पाण्डे

२३ भदौ, नुवाकोट । कांग्रेसको आगामी १४ औं महाधिवेशनको सरगर्मी शुरु हुने बेला कोभिड महामारीले केही सिथिल भएपनि भित्र भित्रै महाधिवेशनको रन्को सबैतिर चलिरहेको छ । राजनीतिमा सधैं चर्चामा रहने नुवाकोट जिल्लामा पनि आन्तरिक राजनीतिक प्रतिस्पर्धा व्यापक हुने गरेको छ ।

नुवाकोटमा दुई हस्तीहरु छ्न् । पौडेल पक्षमा दुईजना पुर्वमन्त्री अर्जुननरसिंह केसी र पूर्व अर्थमन्त्री डा. रामशरण महत छ्न् भने उनीहरुका उत्तराधिकारी देखिएका पुर्व सांसद एवं नुवाकोट पार्टी सभापति जगदीश्वर नरसिंह केसी र युवा नेता रमेश महत चर्चा छ्न् भने सभापति देउवा प्यानलका सहमहामन्त्री डा. प्रकाशशरण महत र सांसद बहादुर सिंह लामा पनि नुवाकोटका लोकप्रिय नेता हुन् ।

आउँदो अधिवेशनमा नुवाकोटमा जिल्ला सभापतिका लागि रमेशकुमार महत स्पष्ट उम्मेदवारका रुपमा चर्चामा छन् ।वर्तमान पार्टी सभापति केसीले बागमति प्रदेशको सभापतिमा उम्मेदवारी घोषणा गरेपछि महतका लागि ठाउँ खाली भएको हो । उनलाई अर्जुन नरसिंह केसी र जगदीश्वर नरसिंह केसी तथा डा. महतको समर्थन प्राप्त छ । बहालवाला सभापति कै समर्थन हुँदा रमेश महतलाई यसपटक चुनाव जित्न अलि सजिलो हुनसक्ने अनुमान लगाउन सकिन्छ । यद्दपि संस्थापन पक्षको तर्फबाट धुव्र अधिकारीको नाम आएको छ । उनी पनि पुर्व जिल्ला सभापति भैसकेका भद्र एवं लोकप्रिय नेता नै हुन् ।

त्यस्तै एक नम्बर क्षेत्रको क्षेत्रीय सभापतिमा भने जगदीश्वर नरसिंह केसीले आफ्ना खास व्यक्तिलाई बनाउनु पर्ने दावी गर्ने प्रवल संभावना छ । किनभने जिल्ला सभापतिमा महतलाई बनाएवापतको सोधभर्ना लिने कोशिश हुने नै छ । हालका क्षेत्रीय सभापति धुव्र श्रेष्ठ पनि सभापतिका अर्का दावेदार हुन् । लिखु गाउँपालिकाका अध्यक्ष मात्रै नभएर लोकप्रिय नेता पनि भएका कारण यहाँ ठूलै रस्साकसी हुने देखिएको छ । केसी समुह धुव्र श्रेष्ठलाई उठाउन चाहदैनन् तर डा. महत उनकै नजिकका कार्यकर्ता पनि हुन् ।

उसो त सो पदका लागि धेरै युवा सर्कलको दावेदारी देखिएको छ । जसमा पुर्व उपसभापति विषम रिमाल, रमेश पाठक, अच्युत गुरागाई तथा युवा समाजसेवी सुशील खड्का लगायका छन् । संस्थापन पक्षको तर्फबाट महाधिवेशन प्रतिनिधि अच्युत गुरागाई लड्ने देखिन्छ भने उनलाई डा. महत र केसीको पनि समर्थन रहन सक्छ ।

अर्का दावेदार सुशील खड्का सफल व्यापारी, समाजसेवी र युवाहरुमाझ अत्यन्तै लोकप्रिय मानिन्छ्न् । रमेश कुमार पाठक पनि अत्यन्तै सफल उद्योगी हुन भने समाजसेवामा अब्बल व्यक्ति हुन् । उनी जीपी कोइराला फाउन्डेशन नुवाकोटका प्रमुख पनि हुन् । यही क्षेत्रीय सभापतिको चयनबाट नै आगामी जिल्ला सभापति को हुने भन्ने बारे निर्णयक हुनेछ ।