राष्ट्रिय टिमबाट १०० गोल गर्ने पहिलो युरोपेली खेलाडी रोनाल्डो

२४ भदौ, काठमाडौं । सुपरस्टार क्रिस्टियानो रोनाल्डोले अन्तर्राष्ट्रिय फुटबलमा १०० गोल पूरा गरेका छन् । पोर्चुगलका लागि १०० गोल गर्ने रोनाल्डो पहिलो युरोपेली खेलाडी समेत बनेका छन् । युइएफए नेशन्स कप अन्तर्गत गएराती भएको खेलमा स्वीडेनलाई २–० गोलले हराउदै रोनाल्डोले १०० अन्तराष्ट्रिय गोलको आँकडा पार गरेका हुन् । पोचुगललाई जिताउन दुई गोल गरेका उनले पोर्चुगलका लागि गोल संख्या १०२ पुर्याएका छन् ।

अब उनी सर्वाधिक अन्तर्राष्ट्रिय गोल गर्ने इरानका अली दाइको नाममा रहेको कीर्तिमानबाट ८ गोल मात्र पछि छन् । अलीले सन् १९९३ देखि २००६ सम्म १०९ गोल गरेका थिए । रोनाल्डोको पछाडि रहेका भारतका सुनिल क्षेत्रीले ७२ र अर्जेन्टिनाका लिओनल मेसीले ७० गोल गरेका छन् ।