रहेनन् लेखक तथा निर्देशक छेतेन गुरुङ

२४ भदौ, काठमाडौं । नेपाली चलचित्रका लेखक तथा निर्देशक छेतेन गुरुङको मृत्यु भएको छ । बुधबार बिहान गुरुङको  मृत्यु भएको हो । लामो समयदेखि कलेजो रोगबाट ग्रसित उनको पछिल्लो समय उपचार जारी रहेपनि सञ्चो हुन सकेको थिएन ।

केही दिनयता गम्भिर अवस्थामा रहेका उनको बुधबार बिहान २ बजे ४२ बर्षको उमेरमा महारागंजस्थित मेट्रो अस्पतालमा मृत्यु भएको हो । नेपाली चलचित्र क्षेत्रमा उनी स्क्रिप्ट लेखकका रुपमा चर्चित छन् । कथा र पटकथा लेखनमा आफ्नो छाप बनाएका उनले पछिल्लो समय निर्देशकका रुपमा पनि परिचित थिए ।

एक समयको सुपरहिट चलचित्र ‘नोभेम्बर रेन’को कथा लेखेर उनले आफूलाई चलचित्र लेखकका रुपमा परिचित गराएका थिए । जुन चलचित्रबाट उनले उत्कृष्ट लेखकको अवार्ड पाउँदा आर्यन सिग्देल र नम्रता श्रेष्ठले उत्कृष्ट नायक नायिकाका रुपमा धेरै अवार्ड जितेका थिए ।

‘डमरुको डन्डबियो’ चलचित्र निर्देशन गरेका उनले पछिल्लो समय ‘प्रेमगित ३’ निर्देशन गरेका थिए । सन्तोषसेन ठकुरीको हिट सिरिज अन्तर्गत ‘प्रेमगित ३’ को कथा लेखेका उनले निर्देशनको जिम्मा समेत पाएका थिए । मनाङमा गएको हिउँदमा चलचित्रको सुटिङ गरेका उनी अहिले पोष्ट प्रोडक्सनमा व्यस्त थिए । चलचित्र गएको चैत २८ गते प्रदर्शन गर्ने भनेपनि कोरोनाका कारण २०७७ चैत २८ गते सरेको थियो । यो चलचित्र उनको जीवनको अन्तिम चलचित्र समेत बनेको छ ।

यही बीचमा उनलाई पुरानै रोगले च्यापेको हो । कुनै समय गाँजा, चुरोट र लागुऔषधका अम्मली गुरुङ लामो समय रिह्याब सेन्टरमा बसेका थिए । लागुऔषध दुव्र्यसनीकै क्रममा उनी झण्डै एकपटक गम्भिर बिरामी पर्दा मृत्युको मुखबाट फर्केका थिए । त्यहीबेला उनले आफ्नी छोरीले भनेको मानेर लागुऔषध छाडेका थिए । तर उनलाई लागुऔषधको असर भने दीर्घकालिन रुपमा शरीरमा परिसकेको थियो ।

जसका कारण उनले ४२ बर्षकै अल्पायुमै ज्यान गुमाउनुपर्यो । उनकी आमा र छोरी छन् । उनकी श्रीमतिको भने यसअघि नै मृत्यु भइसकेको थियो । गुरुङको मृत्युमा नेपाली चलचित्र क्षेत्रका सबैले सामाजिक सञ्जालमा श्रद्धाञ्जली व्यक्त गरेका छन् ।