शुल्क नतिरेपछि प्रिन्सिपलले अभिभावकको खुट्टा भाचिदिए

२५ भदौ, बुटवल । कोरोना भाइरसको महामारीमा पनि शुल्क नतिरेको भन्दै रुपन्देहीका एक निजी विद्यालयका प्रिन्सिपलले अभिभावकमाथि कुटपिट गरेर खुट्टा नै भाचिदिएका छन् ।

नवलपुरको विनयी त्रिवेणी गाउँपालिका–६, रानीनगरमा रहेको उज्ज्वल शिशु बोर्डिङका प्रिन्सिपल दीपक कुँवरले नवलपरासी पश्चिम सुस्ता गाउँपालिका–३ पत्थरकलाका कृष्णप्रसाद आचार्यको कुटपिट गरेर खुट्टा भाचेका हुन् । ८ बर्षदेखि दुई छोरा पढेको शुल्क नतिरेको भन्दै प्रिन्सिपल कुँवरले अभिभावक आचार्यमाथि कुटपिट गरेका हुन् ।

खुट्टा भाचिएपछि उपचारका लागि अस्पताल भर्ना भएका उनको २ लाख २० हजार बील आएको छ । तर तिर्ने रकम नभएपछि अस्पतालमै बस्नुपरेको उनले गुनासो गरेका छन् । बुटवलको लुम्बिनी सिटी अस्पतालमै अलपत्र परेका उनले सहयोगको याचनासँगै आफूलाई कुटपिट गर्ने प्रिन्सिपल कुँवरमाथि कारबाहीको माग गरेका छन् । उनीमाथि कुटपिट गर्ने प्रिन्सिपल भने फरार भएका छन् ।