चितवनमा कोरोना संक्रमितको संख्या ११ सय पुग्यो

२६ भदौ, चितवन । चितवनमा थप ३४ जनालाई कोरोना भाइरसको संक्रमण पुष्टि भएको छ । भरतपुर कोभिड प्रयोगशालामा नमूना परीक्षण गर्दा थप ३४ जनामा संक्रमण पुष्टि भएको हो ।

संक्रमित हुनेमा चितवनका मात्रै ३१ जना छन् । चितवनमा संक्रमण पुष्टि हुनेहरु सबै भरतपुर महानगरपालिकाका हुन् । उनीहरु सबैको भरतपुर अस्पताल स्वाब संकलन केन्द्र, पुरानो मेडिकल कलेज, पुष्पाञ्जली अस्पताल र क्वारेन्टिनबाट स्वाब संकलन गरिएको हो ।

यसैगरी, पूर्वी नवलपरासीको गैंडाकोट नगरपालिका–१ का २८ वर्षीय पुरुष र २९ वर्षीया महिलामा संक्रमण पुष्टि भएको छ । यस्तै पर्साको ठोरी–२ की २१ वर्षीया महिलामा पनि कोरोना भाइरस संक्रमण पुष्टि भएको प्रयोगशालाले जनाएको छ ।

चितवनमा शुक्रबार बिहानसम्म कुल संक्रमितको संख्या ११ सय पुगेको छ ।