बीमा समितिमाथि राजनीतिक दवाव

२६ भदौ, काठमाडौं । बीमा समितिमा कम्तिमा एकसहित दुई निर्जीवन र एक जीवन बीमा कम्पनी दर्ता गर्ने प्रयास भइरहेको छ । यद्यपि बीमा समितिले भने दर्ता प्रक्रिया अघि नबढेको दावी गरेको छ ।

बीमा समितिले लिखित रुपमा निर्णय गरी नयाँ बीमा कम्पनी दर्ता प्रक्रिया बन्द गरेकै अवस्थामा केही नयाँ बीमा कम्पनीहरु भने दर्ता गर्न कम्मर कसेर लागेका छन् । बीमा समितिलाई सरकार निकट र प्रमुख प्रतिपक्ष निकटको प्रभावमा पार्दै उच्च राजनीतिक दवावसहित नयाँ बीमा कम्पनी दर्ताको प्रक्रिया शुरु गरिएको हो ।

बीमा समितिमा अत्यन्तै सुरक्षित रुपमा दर्ता गर्न खोजिएको कम्पनीबारे केही बाहिर ल्याइएको छैन । बीमा समितिका अध्यक्ष चापागाईमाथि राजनीतिक दबाव सिर्जना गरेर नयाँ कम्पनी दर्ता गर्ने प्रयास भएको हो ।

सुत्रका अनुसार नेपाली कांग्रेस नेतृ आरजु राणाको लगानी रहेको कम्पनी तथा नेकपा नेतृत्वका उच्च नेतृत्वको संरक्षण प्राप्त कम्पनीहरु दर्ताको लागि अघि बढेका छन् । दर्ता हुने नहुने भने एकिन भइसकेको छैन ।

बीमा समितिका अध्यक्ष चिरञ्जीवी चापागाईको कार्यकाल सकिन लागेको छ । अध्यक्ष चापागाई बीमा समितिबाट विदा हुनुअघि दवाव सिर्जना गरेर नयाँ कम्पनी दर्ता गर्न सक्ने अनुमान गरिएको छ ।

अर्थमन्त्री प्रम केपी ओलीको हातमा पुगेको बेला सल्लाहकार विष्णु रिमालमार्फत दबाव सिर्जना गरी नयाँ बीमा कम्पनी दर्ता गर्ने प्रक्रिया अघि बढाउन खोजिएको छ ।