एक किलो तरकारीको मूल्य डेढ लाख रुपैयाँ

२६ भदौ, एजेन्सी । तपाईले एक किलो तरकारीको मूल्य कति हाल्नुहुन्छ ? २० रुपैयाँ, ५० रुपैयाँ, १०० रुपैयाँ वा त्यो भन्दा बढी बढी ५०० रुपैयाँ । तर संसारमा एउटा यस्तो तरकारी बजार छ । जहाँ एक किलो तरकारीको मूल्य डेढ लाख पर्छ ।

‘हप शुट्स’ नामको यो तकारी लाग्ने फूललाई ‘हप कोन्स’ भनिन्छ । सोही फूललाई बियर बनाउन प्रयोग गरिन्छ । बोटको बाँकी भागलाई तरकारी वा सलादको रुपमा खाइन्छ । यो तरकारी यति धेरै महँगो हुनाका कारण कुनै तरकारी बजार वा सुपरमार्केटमा सायदै पाइएला ।

हप शुट्स औषधीय गुणले भरिपूर्ण हुन्छ भनिन्छ । सोही कारण त्यसको प्रयोग जडीबुटीको रुपमा पनि हुने गर्दछ । मानिसहरु यसलाई काँचै पनि चपाउने गर्दछन् । यसको औषधीय गुणको पहिचान शदियौँ अघि नै भएको हो । इस्वी सम्वत् ८०० को आसपास मानिसहरुले यसलाई बियरमा मिलाएर पिउँदथे । त्यो सिलसिला अहिलेसम्म पनि चलिरहेको छ ।

सबैभन्दा पहिले यो वनस्पतीको खोज उत्तरी जर्मनीमा भएको थियो । त्यसपछि यसको प्रयोग विस्तारै पूरै विश्वमा नै फैलिएको छ । यसको मूल्य झन झन् बढ्दै गएको छ ।