खैरेनीटार स्वास्थ्यचौकीको सेवा बन्द

३१ भदौ, दमौली । तनहुँको शुक्लागण्डकी नगरपालिका–४ दुलेगौडास्थित खैरेनीटार स्वास्थ्यचौकीको सेवा बन्द गरिएको छ । स्वास्थ्य चौकीमा परीक्षणका लागि आएकी वडा नं १० की २३ वर्षीया महिलामा कोरोना सङ्क्रमण देखिएपछि स्वास्थ्यचौकीको सम्पूर्ण सेवा बन्द गरिएको हो ।

प्रसूतिका लागि आएकी ती महिलामा रक्तचापको समस्या देखिएपछि पोखरा सिफारिस गरिएको थियो । पोखरामा स्वाब परीक्षण गर्दा महिलामा मङ्गलबार कोरोना पुष्टि भएको थियो । आज मात्रै उहाँका २८ वर्षीय श्रीमान्लाई पनि कोरोना पुष्टि भएको छ ।

नगरपालिकाका स्वास्थ्य शाखा प्रमुख अजय श्रीवास्तवले स्वास्थ्यचौकीकी स्वास्थ्यकर्मी महिलाको सम्पर्कमा आएकाले सेवा आजदेखि नै बन्द गरिएको जानकारी दिए ।

“स्वास्थ्यचौकीका स्वास्थ्यकर्मी र कर्मचारी सबैको पीसीआर रिपोर्ट नआइन्जेल सम्पूर्ण सेवा बन्द गरिएको छ”, श्रीवास्तवले भने । उनका अनुसार स्वास्थ्यचौकीका १४ जनाको बिहीबार स्वाब परीक्षण गर्ने तयारी गरिएको छ ।