काठमाडौंमा जोर विजोर प्रणाली कायमै, होटल रेष्टुरेन्टको निषेधाज्ञा हट्यो

३१ भदौ, काठमाडौं । जिल्ला प्रशासन कार्यालय काठमाडौंले उपत्यकामा जोर विजोर प्रणाली कायमै राखेको छ । बुधबार एक सुचना जारी गर्दै प्रशासनले कोरोना महामारीको जोखिम कायमै रहेकाले भदौ २५ पछि जारी गरिएको जोर विजोर प्रणाली कायमै रहेको जनाएको हो ।

जोर विजोरसँगै स्कुल, कलेज, जिमखाना, चिडियाखानामा पनि लगाइएको निषेधाज्ञा कायमै राखिएको छ । तर मन्त्रिपरिषद बैठकको निर्णयअनुसार होटल तथा रेष्टुरेन्टमा लगाइएको निषेधाज्ञा भने हटाइएको छ ।

उपत्यकाका तीनै जिल्लाका प्रजिअले गृह सचिव महेश्वर न्यौपानेसँगको छलफल गरेपछि काठमाडौं जिल्ला प्रशासन कार्यालयले सुचना जारी गरेको हो । यस्तै सैलुन तथा ब्युटी पार्लर, सिनेमा हल र जिम, पब र स्पा भने बन्द नै रहनेछन् ।

यस्तै, शैक्षिक संस्था, सभा समारोह, पार्टी तथा विरोध र्‍याली र सभामा पनि रोक लगाइएको छ । चाडपर्व नजिकिएसँगै निषेधाज्ञामा लचकता अपनाइएको प्रशासनको भनाई छ । तर धेरै व्यवसाय भने भित्रभित्रै खुलिरहेका छन् ।