बल्ल सांसद बने बामदेव, राष्ट्रपतिद्धारा राष्ट्रियसभा सदस्यमा मनोनित

३१ भदौ, काठमाडौं । नेकपाका उपाध्यक्ष बामदेव गौतम सांसद बनेका छन् । प्रतिनिधिसभा चुनाव हारेका बामदेवलाई सरकारको सिफारिसमा राष्ट्रपति विद्यादेवी भण्डारीले राष्ट्रियसभामा मनोनित गरेपछि उनी सांसद बनेका हुन् ।

शीतलनिवास स्रोतका अनुसार बुधबार अबेर मात्रै राष्ट्रपति भण्डारीले बामदेवलाई राष्ट्रियसभा सदस्यमा मनोनित गरेकी हुन् । प्रधानमन्त्री तथा मन्त्रिपरिषद् कार्यालयले बुधबार पठाएको सिफारिसका आधारमा तत्कालै राष्ट्रपति भण्डारीले गौतमलाई राष्ट्रियसभा सदस्यमा मनोनीत गरेको शीतलनिवास स्रोतले जनाएको छ ।

सोमबार बसेको मन्त्रिपरिषद् बैठकले बामदेवलाई राष्ट्रियसभा सदस्यमा मनोनीत गर्न राष्ट्रपति समक्ष सिफारिस गर्ने निर्णय गरेको थियो। त्यसअघि नेकपाको सचिवालय बैठकले उनलाई राष्ट्रियसभामा पठाउने निर्णय गरेपछि प्रधानमन्त्री ओलीले मन्त्रिपरिषद बैठकबाट अनुमोदन गराएर राष्ट्रपतिसमक्ष सिफारिस गरेका हुन् ।

२०७४ सालको प्रतिनिधिसभा सदस्य चुनावमा बामदेव बर्दियाबाट पराजित भएका थिए । चुनाव हारेका व्यक्तिलाई नेकपाले सांसद बनाएको भन्दै सामाजिक सञ्जालमा आलोचना पनि भइरहेको छ।