सरकारले जनताको लागि न्यूनतम काम नगरेको नेता सिंहको आरोप

२ असोज, काठमाडौं । नेपाली कांग्रेसका नेता प्रकाशमान सिंहले सरकारले कोरोना महामारीका बेलाका जनताको लागि गर्नुपर्ने न्यूनतम काम पनि नगरेको आरोप लगाएका छन् । लौह पुरुष गणेशमान सिंहको २३औं स्मृति दिवसका अवसरमा शुक्रबार चाक्सिबारीमा आयोजित कार्यक्रममा नेता सिंहले यस्तो बताएका हुन् ।

मेडिकल सामग्री खरिदमा समेत घोटालाा हुँदा जनताले सरकारसँग चित्त दुखाएको सिंहको भनाइ थियो । दुईतिहाइ नजिकको सरकारले संविधानको भावनाअनुसार संघीय कानुन नबनाउँदा स्थानीय सरकारलाई काम गर्न समस्या भएको पनि उनले बताए ।

देश संघीयतामा गइसके पनि सरकारको ध्यान केन्द्रीयकरणमै रहेको भन्दै सिंहले संविधानको मर्म र भावनाविपरीत नजान पनि सरकारलाई सचेत गराए । जनताले झन्डै दुईतिहाइ मत सुशासनका लागि दिए पनि सरकार ललिता निवास प्रकरण, यति होल्डिङ्स, सेक्युरिटी प्रिन्टिङ प्रेसलगायत कान्डमा मुछिएको उनले टिप्पणी गरे ।

लौह पुरुष गणेशमानबाट नेपाली राजनीतिले सिद्धान्त र आदर्शको राजनीति गर्ने प्रेरणा लिन सके देश र जनताको हित हुने बताए । “नेपालका सक्रिय राजनीतिक दलका नेता-कार्यकर्ताहरुले जुन सिद्धान्त र आदर्शको राजनीति गर्ने प्रेरणा उनले दिएका छन, त्यही मार्गमा हिँडेको खण्डमा मात्रै नेपाल र नेपालीको भलो हुन्छ,” उनले पिता गणेशमानलाई स्मरण गर्दै भने ।

उनले नेपालमा प्रजातन्त्र स्थापना गर्न र जनताको अधिकार सुरक्षित गर्न छ दशक लामो राजनीतिक जीवनमा गणेशमान सिंहले १५ वर्ष जेल र १५ वर्ष निर्वासनमा बिताएको पनि बताए । प्रजातान्त्रका लागि ठूलो संघर्ष गरेको र कष्ट सहेकै कारण गणेशमानलाई नेपाली जनताले सधैँ सम्झिरहने सिंहको भनाइ थियो ।

नेता सिंहले गणेशमानको स्वच्छ, निष्कलंकित छविकै कारण कांग्रेसको आह्‍वानमा भएको २०४६ सालको जनआन्दोलनमा कम्युनिस्ट पार्टीहरूले नेतृत्व स्वीकारेको पनि सिंहले बताए । सर्वमान्य नेता सिंहको नेतृत्वमा ०४६ सालको जनआन्दोलन संयुक्तभन्दा पनि कार्यगत एकताका आधारका भएको उनले बताए ।