विश्व सम्पदामा सूचीकृत पशुपति क्षेत्रबाट २ अर्बको बालुवा निकालिदै

२ असोज, काठमाडौं । विश्व सम्पदा सूचीमा रहेको पशुपति क्षेत्रबाट बालुवा उत्खनन गर्ने तयारी गरिएको छ । भदौ १९ गते संस्कृति, पर्यटन तथा नागरिक उड्डयन मन्त्रालयमा बसेको पशुपति क्षेत्र विकास कोषको बोर्ड बैठकले दुई अर्बको बालुवा उत्खनन् गर्ने निर्णय गरेको हो ।

५३ लाख घनमिटर बालुवा निकाल्न टेन्डर समेत आह्वान गर्ने निर्णय पनि भइसकेको छ । कोषको गुरुयोजना कार्यान्वयन गर्ने क्रममा ढिस्कोले अवरोध भएको र ढिस्को हटाउँदा निस्किने बालुवा व्यवस्थापन गर्न टेन्डर निकाल्न लागिएको हो ।

यसले पशुपति क्षेत्रमा असर गर्छ वा गर्दैन ? भन्ने विषयमा विस्तृत सोधखोज भइसकेको छैन् । साथै पशुपति क्षेत्रबाट निकालिएको बालुवा त्रिभुवन अन्तर्राष्ट्रिय विमानस्थलको निर्माण काममा प्रयोग गरिने पनि दाबी सरकारको छ ।

मन्त्रालयका सचिव केदारबहादुर अधिकारीका अनुसार पशुपति क्षेत्रबाट प्रतिघनफिट ११ रुपैयाँमा बालुवाको टेन्डर लगाउने निर्णय भएको छ।गोठाटारपट्टी रहेको बालुवाको ढिस्को उख्खनन् गर्दा ७० प्रतिशत बालुवा र ३० प्रतिशत माटो निस्किने अध्ययन टोलीको निष्कर्ष छ । टेन्डर आह्वान गरेपछि वातावरणीय प्रभाव मूल्यांकन पनि गर्ने तयारी छ ।

टेन्डर दुई अर्ब ६ करोड बराबरको हुने अनुमान गरिएको छ । कोषका अनुसार अहिले पशुपति क्षेत्र विकास कोषको गुरुयोजना कार्यान्वयन हुने चरणमा छ। यसबेला त्यहाँ रहेका ढिस्काहरू सम्याउनु पर्ने देखिएकाले टेन्डर गर्न लागिएको हो ।