सत्याग्राहीको अगाडी झुक्यो प्रहरी, शिक्षण अस्पतालमा डा.केसीको अनसन जारी

६ असोज, काठमाडौं । नेपालगञ्जबाट काठमाडौं झर्नेवित्तिकै अपहरणको शैलीमा वीर अस्पतालको ट्रमा सेन्टर पुर्याइएका डा. गोविन्द केसीको अगाडी अन्ततः प्रहरी समेत झुकेको छ । उनलाई ट्रमा सेन्टरमै बन्धक बनाएर राख्ने कोसिस सरकारको भएपनि डा.केसीले नमानेपछि प्रहरीले ट्रमाबाट शिक्षण अस्पताल जान दिएको छ ।

केहीबेरअघि डा. केसी ट्रमा छाडेर शिक्षण अस्पताल पुगेर अनसनलाई निरन्तरता दिएका छन् । त्रिभुवन विमानस्थलबाट झर्नेवित्तिकै प्रहरीले अपहरणकै शैलीमा जबर्जस्ती एम्बुलेन्समा हालेर डा. केसीलाई ट्रमा सेन्टरमा ल्याएर राखेको थियो । तर डा.केसीले त्यहाँ बस्न मानेका थिएनन् ।

डा.केसीले नमानेपछि र प्रहरीकै आलोचना भएपछि अन्ततः उनलाई आफ्नो रोजेको ठाउँमा जान दिइएको हो । शिक्षण अस्पतालको आकस्मिक कक्षमा भर्ना भएका डा.केसीले त्यहाँबाटै अनसनलाई निरन्तरता दिएका हुन् ।

यसपटक जुम्लाबाट अनसन थालेका उनले त्यहाँ फेरि झडप हुने अवस्था आएपछि आफै काठमाडौं आएका हुन् । भदौ २९ देखि अनसन जारी राखेका डा.केसीको मागबारे अहिलेसम्म सरकार बोलेको छैन् ।

शुरुमा बेवास्ता गर्ने भएपनि दबाब दैनिक बढ्दै गएपछि जुनसूकै सरकार पनि डा.केसीको अनसनमा झुकेर सहमति गर्ने गरेका छन् । तर सहमति कार्यान्वयन नहुँदा डा.केसी पटक पटक अनसन बस्दै आएका छन् ।