मेस्सी रोनाल्डो उत्कृष्ट खेलाडीको मनोनयनमा पर्न असफल

८ असोज, एजेन्सी । एक दशक विश्व फुटबलमा एकछत्र राज गरेका मेस्सी र रोनाल्डो यस बर्ष यूईएफए प्लेयर अफ दि इयर अवार्डको मनोनयनमा पर्न असफल भएका छन् ।

युरोपियन फुटबलको सर्वोच्च निकाय यूईएफएले सार्वजनिक गरेको मनोनयनमा मेस्सी रोनाल्डो बाहेक अरु तीन खेलाडी परेका छन् । मनोनयनमा म्यान्चेस्टर सिटीका केभिन डी ब्रुएन, बायर्न म्युनिखका रोबर्ट लेवान्डोस्की र मानुएल नुएर रहेका छन् ।

यूईएफएले सार्वजनिक गरेको मनोनयनमा पहिलो पटक लियोनल मेस्सी र क्रिस्टियानो रोनाल्डो नपरेका हुन् । बार्सिलोनाका मेस्सी र युभेन्ट्सका रोनाल्डो पछिल्लो १० वर्षमा पहिलो पटक मनोनयनमा नपरेका हुन् ।

महिलाको प्लेयर अफ दि इयर अवार्डका लागि ओलम्पिक लुसी ब्रोन्ज, पेर्निल हार्डेर र वेन्डी रिनार्ड परेकी छिन् । कोच अफ दि इयर अवार्डका लागि पुरुषतर्फ बायर्नका हान्स डीटर, लिभरपुलका योर्गेन क्लोप र लाइपजिगका जुलियन मनोनयनमा परेका छन् ।

महिलातर्फ बार्सिलोनाका लुइस कोर्टिस, उल्फवर्गका स्टेपहान लेर्च र ओलम्पिक लियोनेसका जिन लुक मनोनयनमा परेका छन् । अवार्ड आगामी अक्टोबर १ मा प्रदान गरिनेछ ।