राप्रपाले १५ दिन भित्र विधान मस्यौदा प्रतिवेदन पेश गर्ने

८ असोज, काठमाडौं । राष्ट्रिय प्रजातन्त्र पार्टीका त्रय अध्यक्षको बैठकले पार्टीको अन्तरिम विधानलाई पार्टी एकताको आधारपत्रको भावना समेटेर १५ दिन भित्र विधान मस्यौदा प्रतिवेदन पेश गर्ने भएको निर्णय गरेको छ ।

बिहीबार बसेको त्रय अध्यक्षको बैठकले  पार्टीको अन्तरिम विधानमा सुझाव दिन सात सदस्यीय समिति गठन गरेको छ । १५ दिनभित्र विधान मस्यौदा प्रतिवेदन तयार गरी पेश गर्ने जिम्मेवारीसहित निरञ्जन थापाको संयोजकत्वमा समिति गठन गरिएको हो ।

राप्रपाका केन्द्रीय सचिवालय प्रमुख ध्रुबबहादुर प्रधानका अनुसार समितिको सदस्यहरुमा भरतजंग उप्रेती, श्यामबहादुर शाही, भक्तिप्रसाद सिटौला, राजु बस्नेत, चन्द्र काफ्ले र रामशरण पाठक रहेका छन् । राप्रपाले आगामी वैशाख २५–२८ गते एकता महाधिवेशन गर्ने निर्णय यसअघि नै गरिसकेको छ ।