विश्वभर खोप पत्ता लाग्नुअघि संक्रमणबाट २० लाखकाे मृत्यु हुने

१० असोज, काठमाडौं ।  कोरोना भाइरसविरुद्धको खोप पत्ता लाग्नुअघि विश्वभर कोरोना संक्रमणबाट ज्यान गुमाउनेको संख्या २० लाख पुग्न सक्ने भएकाे छ । विश्व स्वास्थ्य संगठन ‘डब्ल्यूएचओ’का आपतकालीन सेवाका प्रमुख डा. माइक रायनले खाेप पत्ता लाग्ने समयसम्म  २० लाखले ज्यान गुमाउने चेतावनी दिएका हुन्।

उनले  कोरोना संक्रमणबाट जोगिन एकीकृत र प्रभावकारी कदम चाल्नुपर्नेमा समेत जोड दिएका छन । सन् २०१९ को डिसेम्बर अन्त्यतिर चीनको वुहानबाट कोरोना भाइरसको संक्रमण फैलिन सुरु गरेको थियो । त्यसयता कोरोना संक्रमणका कारण विश्वभर झण्डै १० लाख मानिसको ज्यान गइसकेको छ ।

यसैगरी कोरोना संक्रमण पुष्टि भएकाहरुको संख्या तीन करोड २० लाखभन्दा धेरै छ । डब्ल्यूएचओको आपतकालीन सेवाका प्रमुख डा रायनले कोरोना महामारी रोक्न राम्रो उपचार र प्रभावकारी खोपमात्रै सबथोक नभएको बताए । त्यसका लागि सबै देशका सरकारहरुले कोरोना नियन्त्रणका लागि सम्भव भएसम्मका सबै उपाय कडाइका साथ अपनाउनुपर्नेमा उनले जोड दिए ।