कोरोनाले विराटनगर र धरानमा २ जनाको मृत्यु

१२ असोज, विराटनगर । कोरोना भाइरसको संक्रमणबाट विराटनगर र धरानमा दुई जनाको मृत्यु भएको छ । सोमबार बिपी कोइराला स्वास्थ्य विज्ञान प्रतिष्ठान धरानमा ३८ वर्षीय महिला र नोबेल मेडिकल कलेज विराटनगरमा ५१ वर्षीय पुरुषको मृत्यु भएको हो ।

झापाको गौरादह १ घर भएका ५१ वर्षीय पुरुषको सोमबार दिउँसो १ बजे नोबेल शिक्षण अस्पतालको आइसोलेसनमा मृत्यु भएको हो । गत मंगलबारदेखि आइसोलेसनमा भर्ना गरेर संक्रमित पुरुषको उपचार सुरु गरिएपनि उनको मृत्यु भएको हो ।

श्वासप्रश्वासमा समस्या भएकोभन्दै ती पुरुषलाई ३ असोजमा उपचारका लागि नोबेल ल्याइएको थियो । मृतक पुरुषमा मधुमेह, उच्च रक्तचाप र कलेजो सम्बन्धी समस्या थियो । यस्तै सोमबार धरान उपमहानगरपालिका २ की ३८ वर्षीय महिलाको बीपी कोइराला स्वास्थ्य विज्ञान प्रतिष्ठान धरानमा मृत्यु भएको हो ।

ज्वरो, खोकी र श्वासप्रश्वासमा समस्या र नेमोनियाको लक्षण देखिएपछि उनलाई आइतबार उपचारको लागि प्रतिष्ठानमा भर्ना गरिएको थियो ।