लिभरपुलको शानदार जित, आर्सनल पराजित

१३ असोज, एजेन्सी । प्रिमियर लिगको महत्वपूर्ण खेलमा लिभरपुलले आर्सनललाई पराजित गरेको छ । सोमबार राति एनफिल्डमा लिभरपुलले आर्सनललाई ३–१ गोल अन्तरले हराएको हो ।

लिभरपुलका लागि साडियो माने, एन्डी रोबर्टसन, डियगो जोटाले गोल गरे । एलेक्जेन्डर लाकाजेट्टीले शुरुवाती गोल गरेपनि आर्सनलले थप गोल गर्न सकेन । जारी सिजनको शुरुवाती समयमा आर्सनलको यो पहिलो हार हो भने लिभरपुल लगातार ३ खेल जित्न सफल भएको छ ।

जितसँगै ३ खेलमा ९ अंक जोड्दै लिभरपूल तालिकाको दोस्रो स्थानमा उक्लिएको छ । समान अंक भएपनि गोल अन्तरमा लेस्टर सिटी शीर्ष स्थानमा छ । हिजो म्यान्चेष्टर सिटीलाई ५–२ गोलको फराकिलो अन्तरले हराएको लेस्टर शीर्ष स्थानमा उक्लिएको हो । लिभरपुलसँग हारेको आर्सनल भने ६ अंक सहित तालिकाको पाँचौ स्थानमा छ ।