पर्सा र सर्लाहीमा दुई संक्रमितको मृत्यु

१३ असोज, वीरगञ्ज । पर्सा र सर्लाहीमा कोरोना संक्रमित दुई जनाको मृत्यु भएको छ । मृत्यु हुनेमा पर्साको सखुवा प्रसौनी गाउँपालिका–१ रेञ्ज औराहाका ६५ वर्षीय पुरुष र सर्लाहीको बरहथवा नगरपालिका–६ का ७६ वर्षीय पुरुष हुन् ।

पर्साका ६५ वर्षीय संक्रमित पुरुषलाई वीरगञ्जबाट थप उपचारका लागि चितवनको भरतपुर लैजाने क्रममा बाटोमा नै मृत्यु भएको मृतकका आफन्तले बताएका छन् । उनी मृगौला रोगी हुन् ।

नारायणी बयोधा र नेशनल मेडिकल कलेजमा गरी उनको १८ पटक डायलायसिस भइसकेको थियो । तीन दिनदेखि श्वास प्रश्वासमा समेत समस्या देखिएपछि उनलाई अस्पताल भर्ना गरिएको थियो । उपचारकै क्रममा उनको मृत्यु भएको हो ।

यसैगरी सर्लाहीका ७६ वर्षीय एक पुरुषको उपचारको क्रममा नेशनल मेडिकल कलेज अस्थायी कोरोना अस्पताल वीरगञ्जमा सोमबार राति १० बजे मृत्यु भएको अस्पतालले जनाएको छ ।

सर्लाहीमै विरामी परेका उनलाई उपचारका लागि असोज ११ गते नारायणी अस्पताल ल्याइएको थियो । जिन एक्सपर्ट विधिबाट कोरोना परीक्षण गर्दा रिपोर्ट पोजेटिभ आएपछि उनलाई सोमबार बाबा आइसोलेसनमा सारिएको थियो । आइसोलेसनमा राखेर उनको उपचार गरिए पनि बचाउन नसकिएको अस्पतालका कोभिड फोकल पर्सन डाक्टर असरफ हुसैनले जानकारी दिए ।

मंगलबार नै सर्लाहीको बागमती नदी किनारमा उनको अन्त्येष्टि गरिसकिएको नेपाली सेनाले जनाएको छ ।