सर्वोच्चभित्र सुनुवाई, बाहिर बामदेवविरुद्ध कांग्रेस बीपीको विरोध प्रदर्शन

१४ असोज, काठमाडौं । हारेको व्यक्तिलाई सांसद र मन्त्री नबनाउन माग गर्दै नेपाली कांग्रेस बीपीले काठमाडौंमा प्रदर्शन गर्नुका साथै सर्वोच्च अदालत परिसरमा धर्ना दिएको छ । वामदेव गौतमलाई सरकारले राष्ट्रियसभा सदस्यमा मनोनित गरेको विरोधमा कांग्रेस बीपीले प्रदर्शन गरेको हो ।

गौतमलाई राष्ट्रियसभा सदस्य नबनाउन माग गर्दै सर्वोच्चमा परेको रिटमाथि सुनुवाई चलिरहेका बेला बाहिर महामन्त्री शुशिलमान शेरचनको नेतृत्वमा कांग्रेस बीपीले विरोध प्रदर्शन गरेको हो । हारेका व्यक्तिलाई संविधान विपरित सांसद तथा मन्त्री बनाउन नहुने भन्दै कांग्रेस बीपीले छातीमा प्लेकार्ड बोकेर प्रदर्शन गर्नुका साथै जनताको अभिमतको सम्मान गर्न सर्वोच्चका न्यायाधीशकाे पनि ध्यानाकर्षण गराएका छन् ।

माइतीघरमा प्रदर्शन गरेपछि पूर्वमन्त्री समेत रहेका महामन्त्री शेरचनको नेतृत्वमा कांग्रेस बीपीका नेता कार्यकर्ताले सर्वोच्च परिसर अगाडी विरोध प्रदर्शन गरेका हुन् । प्रदर्शनका क्रममा प्रहरीले हस्तक्षेप गरेको थियो ।

कांग्रेस बीपीले संविधानको खिलापमा गई जनमतको अपमुल्याङ्कन गर्न पाईदैन, जनअनुमत नस्वीकार्ने हो भने निर्वाचनमा राज्यको सम्पत्ति किन दुरुपयोग गरियो, जनअनुमतबाट अस्वीकार भएका नेताहरूलाई चोरबाटो प्रयोग गरि सांसद र मन्त्री बनाउने कार्य बन्द गरियोस, अधिवक्ता दिनेश त्रिपाठी र बद्रीराज भट्टले संवैधानिक पक्षमा दायर गरिएको रिट सुनाईहोस, संविधान भन्दा बाहिरको निर्णयले गलत नजिर स्थापित हुने हुँदा सम्माननिय न्यायाधीशहरुमा चेतना भया , जस्ता नारा लेखिएका प्लेकार्ड बोकेर प्रर्दशन गरेका थिए।

धर्ना दिदै गर्दा सर्वोच्च अदालत अगाडि निषेधित क्षेत्र भएको भन्दै प्रहरीले त्यहाँबाट लखेटेर माइतीघर मण्डला पठाएपछि उनीहरु त्यही धर्नामा बसेका थिए । त्यहाँ केही समय धर्ना बसेपछि शेरचनले संविधानको खिलापमा गई गौतमलाई राष्ट्रियसभामा नियुक्ति गरिन नहुने बताउँदै धर्नाको अन्त्य गरेका थिए ।