नेपालमा पहिलोपटक कोरोनाले वरिष्ठ चिकित्सकको मृत्यु

१५ असोज, काठमाडौं । कोरोना भाइरस संक्रमणबाट नेपालमा पहिलोपटक वरिष्ठ चिकित्सकको मृत्यु भएको छ । कर्णाली प्रदेश अस्पताल सुर्खेतमा कार्यरत ५८ बर्षीय डाक्टर हरिप्रसाद सापकोटाको कोरोना संक्रमणका कारण मृत्यु भएको हो ।

वीरेन्द्रनगरमा रहेको देउती नर्सिङ होममा समेत कार्यरत रहेका डा. सापकोटालाई केही दिनपहिले कोरोना भाइरसको संक्रमण पुष्टि भएको थियो । प्रदेश स्वास्थ्य निर्देशनालयका अनुसार २ साताअघि संक्रमण पुष्टि भएका उनलाई सास फेर्न गाह्रो भएपछि नेपालगञ्जको भेरी अस्पतालमा लगिएको थियो ।

बिहीबार एक्कासी स्वास्थ्यमा समस्या देखिएपछि भेन्टिलेटरमा राखेर उपचार गर्दा बिहीबार दिउँसो ३ बजेतिर उनको मृत्यु भएको हो । सुर्खेतमा नाम चलेका र कर्णालीमै लामो समय स्वास्थ्य क्षेत्रमा योगदान गरेको डाक्टरको कोरोनाकै कारण मृत्यु भएपछि यस भाइरसप्रति गम्भिर बन्न सामाजिक सञ्जालमा आग्रह गरेका छन् ।