पञ्जाबलाई १९२ रनको लक्ष्य, आईपीएलमा रोहितको ५ हजार रन पूरा

१५ असोज, एजेन्सी । आईपीएल क्रिकेटमा मुम्बईले पञ्जाबलाई १ सय ९२ रनको लक्ष्य दिएको छ । दुबईमा टस हारेर पहिले व्याटिङ गरेको मुम्बईले निर्धारित २० ओभरमा ४ विकेट गुमाएर १९१ रन बनाएको हो ।

उसका लागि कप्तान रोहित शर्माले ७० रनको योगदान दिए । आजको अर्धशतकसँगै रोहितले आईपीएल क्रिकेटमा ५ हजार रन पूरा गरेका छन् । उनी ५ हजार रन पूरा गर्ने तेस्रो भारतीय खेलाडी हुन् । यसअघि विराट कोहली र सुरेश रैनाले मात्रै ५ हजार रन पूरा गरेका छन् ।

यस्तै मुम्बईका लागि किरोड पोलार्डले ४७, हार्दिक पाण्डयाले ३० र ईशान किसानले २८ रन बनाए । पञ्जाबका कोट्रेल, शामी र गोथ्वामले एक एक विकेट लिए । १९२ रनको विशाल लक्ष्य पछ्याउँदै पञ्जाबले जवाफी व्याटिङ शुरु गरेको छ ।

उसका ओपनर व्याट्सम्यान लोकेश राहुल र मयंक अग्रवालले आक्रामक शुरुवात गरेका छन् ।