आधुनिक संगीतकार अर्जुन पोखरेलको जन्मदिन !

१६ असोज, काठमाडौं । एउटा गीत, एउटा संगीत र चलचित्र । अहिले नेपाली चलचित्रमा कथावस्तु भन्दा गीत संगीतको भूमिका निकै शक्तिशाली हुने गरेको छ । गीत सुन्न र हेर्न फिल्म हल धाउनु नपरेपनि दर्शकलाई हलसम्म एक अस्त्र हो, गीत संगीत ।

त्यसमाथि चिनेका र नेपाली गीत संगीतलाई बुझेका संगीतकार अर्जुन पोखरेल एक आधुनिक संगीतका बादशाहका रुपमा परिचित हुन थालेका छन् । चितवनमा २०३९ साल असोज १६ गते जन्मिएका संगीतकार पोखरेल निकै मेहनती र सफल संगीतकारका रुपमा परिचित छन् ।

चलचित्र ‘दिलमाया’को शिर्ष गीतमा संगीत भरेर चलचित्र संगीतमा करिअर सुरु गरेका अर्जुनलाई ‘छुट्छ कि साथ, सुन्छु तिमीले मलाई’ लगायतका गीतले दर्शकमाझ परिचित गरायो ।

चलचित्र ‘प्रेमगीत’बाट उनी निकै सफल र चर्चित भएका थिए । ७८ वटा चलचित्रमा संगीत भरिसकेका अर्जुन प्रेमको आभाष दिने गीतका लागि अहिले एक्लो दौडमा छन् ।

अर्जुुनले संगीत भरेका ‘तिमी रोएको पल, भन्छु आज मनका कुरा, किन आजकल, रहर छ सँगै, तिम्रो घरको वरिपरी, म यस्तो गीत गाउँछु’ लगायतका गीत सर्वाधिक चर्चामा छन् ।

हाल आफ्नै रेकडिङ स्टूडियो समेत तयार गरेर काम गरिरहेका अर्जुनले यो बर्ष नै गायिका दुर्गा खरेलसँग बिहे गरेका छन् । नेपाली आधुनिक संगीतका बादशाहका रुपमा परिचित अर्जुन पोखरेललाई सामाजिक सञ्जालमा धेरैले शुभकामना व्यक्त गरेका छन् ।