धोनीको किर्तिमान : चेन्नेईको तेस्रो हार, हैदरावादको दोस्रो जित

१७ असोज, एजेन्सी । आईपीएल क्रिकेटमा हैदरावादले चेन्नेई सुपर किंग्सलाई हराएको छ । शुक्रबार राती भएको खेलमा हैदरावादले चेन्नेईलाई ७ रनले हराएको हो ।

टस जितेर पहिले व्याटिङ गरेको हैदरावादले निर्धारित २० ओभरमा ५ विकेट गुमाएर १६४ रन बनाएको थियो । १६५ रनको मध्यम लक्ष्य पछ्याएको चेन्नेई भने निर्धारित २० ओभरमा ५ विकेट गुमाएर १५७ रनमै सिमित भयो ।

उसका लागि रवीन्द्र जडेजाले अर्धशतकसहित ५० र महेन्द्रसिंह धोनीले नटआउट ४७ रन बनाएपनि टोलीको हार टार्न सकेनन् । हैदरावादका नटराजले २ तथा भुनवेश्वर कुमार र सामुदले एक एक विकेट लिए ।

त्यसअघि पहिले व्याटिङ गरेको हैदरावादका लागि प्रियम गर्गले सर्वाधिक ५१ रन बनाए । २६ बलमा ६ चौका र १ छक्का हानेका उनले टोलीको जितमा निर्णायक भूमिका खेले । विष्फोटक व्याटिङ गरेर टोलीको जितमा नायक बनेका गग म्यान अफ द म्याचबाट पुरस्कृत बने ।

आजको खेलमा हार व्यहोरेपनि धोनीले भने व्यक्तिगत किर्तिमान बनाएका छन् । उनले आईपीएलमा सर्वाधिक खेल खेल्ने खेलाडीमा आफ्नो नाम लेखाएका हुन् । १९४ क्याप जितेका उनले आफ्नै टिमका सहकर्मी सुरेश रैनालाई पछाडी पारेका हुन् । रैनाले १९३ क्याप जितेका छन् ।

तर व्यक्तिगत किर्तिमानी बनाएपनि तेस्रो हार व्यहोरेको धोनीको टिम चेन्नेई अंक तालिकाको पुछारमा परेको छ । यसले चेन्नेईको प्लेअफ पुग्ने सम्भावना कमजोर बन्दै गएको छ ।