चिनियाँ दुतावास अगाडि प्रदर्शन गर्ने नेविसंघका नेताहरु पक्राउ

१८ असोज, काठमाडौं । चिनियाँ दुतावास अगाडि विरोध प्रदर्शन गर्ने नेविसंघका नेताहरु पक्राउ परेका छन् । चिनियाँ दुतावास अगाडि प्रदर्शन गर्ने नेताहरु सिजर भट्ट, अरुण जनाला, वासुदेव न्यौपाने लगायत तीन दर्जन नेताहरुका पक्राउ परेका हुन् ।

उनीहरुलाई कमलपोखरीको मालीगाउँ प्रहरी चौकीमा राखिएको छ । हुम्लाको लिमी उपत्यकामा चीनले अतिक्रमण गरेर नेपाली भूमिमा भवन बनाएको विरोधमा नेविसंघले विरोध प्रदर्शन गरेको हो ।

‘यसलाई अभियान नै बनाएर नेविसंघले विरोध गरिरहेको छ’ नेविसंघका महामन्त्री युवराज पाण्डेले नेपालबहससँग भने, ‘चीनको अतिक्रमणविरुद्ध निरन्तर खबरदारी गर्छौ । नेपाली भूमिमाथिको हस्तक्षेपविरुद्ध बोल्छौ । विरोध गरिहन्छौ ।’

विरोध प्रदर्शनका क्रममा पक्राउ परेका अरुण जनालले विरोधका कार्यक्रम निरन्तर अगाडि बढाउने बताए । एक दुई दिनमा थप सशक्त विरोध कार्यक्रम अगाडि बढाउने उनको भनाई छ । जनालाका अनुसार पक्राउ परेका सबैलाई केहीबेरपछि प्रहरीले रिहा गर्ने जनाएको छ ।