बुटवल प्रदर्शन रोक्न देउवालाई ओली र प्रचण्डको गुहार !

१८ असोज, काठमाडौं । प्रदेश ५ को स्थायी राजधानी दाङ बनाउने निर्णय गरेपछि चर्किएको बुटवल प्रदर्शन रोक्न कांग्रेस सभापति शेरबहादुर देउवासँग नेकपाका अध्यक्षद्धय प्रधानमन्त्री केपी शर्मा ओली र कार्यकारी अध्यक्ष पुष्पकमल दाहाल प्रचण्डले हारगुहार गरेका छन् ।

दाङलाई राजधानी बनाउने नेकपाको निर्णयविरुद्ध बुटवलमा आन्दोलन चर्काएपछि ओली र प्रचण्ड चिन्तित बनेका हुन् । आन्दोलन रोक्न र दाङ राजधानी बनाउने नेकपाको निर्णयमा समर्थन जनाउन ओली र प्रचण्डले देउवासँग आग्रह गरेका हुन् ।

प्रदेश ५ का मुख्यमन्त्री शंकर पोखरेलको आग्रहमा ओली र प्रचण्डले देउवासँग सहयोग मागेका हुन् । पोखरेल सुटुक्क काठमाडौं आएर शीर्ष नेतासँग सहयोग मागेर आजै बुटवल फर्किएका छन् । कांग्रेससँग ओली र प्रचण्डले सहमति खोजेपनि देउवाले भने आन्दोलन नरोक्ने संकेत गरेका छन् ।

आफूसँग सल्लाह नै नगरी राजधानी तोकेपछि कांग्रेस आन्दोलित बनेको हो । प्रदेश ५ सरकारले प्रदेशको नाम लूम्बिनी र राजधानी दाङको भालुवाङ तोक्ने निर्णय गरेपछि कांग्रेस असन्तुष्ट बनेको छ ।