तीनजना मन्त्री थप्न ओली र प्रचण्ड सहमत

२२ असोज, काठमाडौं । बामदेव गौतमको मुद्धा टुंगिन थप समय लाग्ने भएपछि नेकपा अध्यक्ष पुष्पकमल दाहाल प्रचण्डले रिक्त मन्त्रालयमा तत्काल पूर्ति गर्न प्रधानमन्त्री केपी ओलीलाई ‘गो अहेड’ भनेका छन् । सम्भव भए आजै साँझसम्म तीन वटा रिक्त मन्त्रालयमा नयाँ मन्त्री आउने छन् – बालुवाटार निकट स्रोतले भन्यो ।

हिजो साँझ दुई अध्यक्षबीच भएको सहमति अनुसार, मन्त्रिमण्डलको पुनर्गठन भने बामदेवको फैसला आएपछि मात्रै गरिने छ । खासगरी अर्थ मन्त्रालय लामो समय खाली राख्दा समस्या परेको भन्दै प्रधानमन्त्री ओलीले प्रचण्डको सहमति लिन प्रयास गरिरहेका थिए । प्रचण्ड भने बामदेवलाई नै अर्थमन्त्री बनाउनुपर्ने पक्षमा रहेकाले केही समय पर्खने अवस्थामा थिए ।

तर कोरोना संक्रमणले गर्दा सर्वाेच्च अदालतको सुनुवाई नै प्रभावित हुन थालेपछि प्रचण्ड पछि हटेका हुन् । हिजै हुने भनिएको संवैधानिक इजलाश नबसेकाले बामदेवको मुद्धा थप लम्बिने अवस्था आयो, त्यसैले खाली मन्त्रालयमा अहिलेलाई मन्त्री पठाउँदा राम्रै हुने भन्दै अध्यक्षद्वय सहमत भएका हुन् – बालुवाटार निकट स्रोतले भन्यो ।

बामदेवका सन्दर्भमा अहिले केही गर्न नसक्ने भएकाले खाली रहेका अर्थ, सञ्चार तथा सूचना प्रविधि तथा शहरी विकास मन्त्रालयमा मन्त्री ल्याइने भएको हो । यसका लागि प्रधानमन्त्री ओलीले लगभग तयारी गरिसकेको स्रोतको भनाई छ । अर्थ मन्त्रालयमा पार्टी महासचिव विष्णु पौडेललाई ल्याउने भएका छन् । यसबारे उनले प्रचण्डलाई जानकारी दिइसकेका छन् ।

सहमति अनुसार, अहिले तीन मध्ये दुई मन्त्रालयमा पूर्व एमाले र एउटामा पूर्व माओवादी केन्द्रबाट मन्त्री थपिने छ । प्रचण्डले मनाउन सकेभने स्थायी कमिटी सदस्य जनार्दन शर्मालाई अहिले सञ्चार तथा सूचना प्रविधि मन्त्रालय दिएर मन्त्रिमण्डलमा ल्याइने छ । शर्मा भने गृह मन्त्रालय पाउनुपर्ने अडानमा छन् । तर पूर्व माओवादी पक्षकै रामबहादुर थापा अहिले गृह मन्त्रालयको जिम्मेवारीमा रहेका छन् ।

थापालाई हटाएर शर्मालाई ल्याउने पक्षमा प्रचण्ड पनि रहेका छन् । तर प्रधानमन्त्री ओली भने थापालाई नै गृहमा निरन्तरता दिने पक्षमा रहेका छन् । त्यसैले गर्दा प्रचण्डले एउटा मोडालिटी बनाएर मात्रै पुनर्गठन गरौं भन्ने प्रस्ताव राखेका छन् । तर ओली भने त्यसको विपक्षमा रहेकाले पुनर्गठनमा समस्या आइपरेको हो ।

यसैगरी रिक्त शहरी विकास मन्त्रालयमा पूर्व एमाले पक्षबाट सुरेन्द्र पाण्डेलाई ओलीले प्रस्ताव गरेका छन् । तर पाण्डले भने अर्थ मन्त्रालय पाएमात्रै मन्त्रिमण्डलमा सहभागी हुने अडान लिइरहेका छन् । त्यसैले सहमति जुटेन भने महेश बस्नेतलाई शहरी विकास मन्त्रालयको जिम्मेवारी दिने पक्षमा ओली रहेको बुझिएको छ ।

तर नेता माधवकुमार नेपाल पक्षले भने यसबारे छलफल गर्न बाँकी रहेको बताएको छ ।  पाण्डेले शहरी विकासमा जान आनाकानी गरे विरोध खतिवडालाई पठाउने उनको सोच छ । यसबारे नेता नेपालले अध्यक्ष प्रचण्डसँग कुरा गरिसकेका छन् । तर अन्तिम टुंगो भने लागिसकेको छैन । बाँकी पुनर्गठन गर्ने विषयमा भने दशैंपछि मात्रै छलफल गर्न अध्यक्षद्वय राजी भएका छन् – स्रोतले भन्यो ।

अहिले चाहिं रिक्त मन्त्रालय मात्रै पूर्ति गर्ने हो , यसले बाँकी मन्त्रीहरुलाई समेत ढुक्क भएर काम गर्न सहज भएको बालुवाटार निकट स्रोतले बतायो । बालुवाटारमा कोरोना संक्रमण व्यापक देखिएकाले हाल नेताहरुबीचको आवतजावत र भेटघाट नै पातलिएको छ । सकेसम्म थोरै मानिस मात्रै बालुवाटार प्रवेश गर्न दिने गरी सुरक्षा व्यवस्था कडा पारिएको पनि स्रोतले बताएको छ ।