लाेकगायिका दिलु सलामी मगरको यथार्थ जीवनमा आधारित गीत ‘होनी बरै’ सार्वजनिक

२४ असोज, काठमाडौं । लोक तथा दोहोरी गायिका दिलु सलामी मगरले आफ्ना स्वर्गीय भएका बुवाको सम्झनामा लोकगीत “होनी बरै ” सार्वजनिक गरेकी छन् ।

उसो त उनको आफ्नै वास्तविक कहानीमा आधारित यस गीतमा शब्द,लय, स्वर तथा परिकल्पना समेत उनी स्वयंकै रहेको छ । बुवाको स्वर्गेबास भएका जो कोहीको पनि गीत हेरेर सुनेर आँखा नरसाउला भन्न सकिन्न ।

दिवान किनारले संगीत संयोजन तथा मिक्सिङ मास्टरिङ गरेको गीत एम बी रेकर्डिङ स्टुडियोमा रेकर्डिङ गरिएको हो । भिडियोतर्फ भने सुरवीर पन्डित र रमा थपलियाले जीवन्त अभिनय गरेका छन् ।

मानसिङ खड्काले निर्देशन गरेको गीतमा सागर गौतमको छायांकन तथा राजकुमार मगरको सम्पादन रहेको छ । गीतको भिडियो दिलु सलामी मगरको युटुबमार्फत रिलिज गरिएको हो।