आईजीपीको नीतिलाई नै माथ खुवाउने न्यापाने र गिरि को हुन् ?

२५ असाेज, चितवन । वर्तमान आईजीपी शैलेश थापा क्षेत्रीले संगठनलाई आमूल परिवर्तन गर्लान् भन्ने आम चर्चा र विश्वास भईरहेको बेला काम भने ठीक उल्टो देखिएको छ । जसरी मिशनमा जान जेष्ठताको आधार बनाइयो त्यसरी नै सरूवामा पनि पारदर्शिता होला भन्ने सबै प्रहरीमा विश्वास थियो । अझ काज प्रक्रिया त रकम उठाउने मेसो भएको छ ।

त्यसको सानो उदाहरण चितवनमा लामो समयदेखि कार्यरत विवादित दुई प्रहरीको घटनाले पुष्टि गर्छ । हवल्दार बाबुराम न्यौपाने र सिपाही पवन गिरी यसको उदाहरण हुन् । जागिर खाएदेखि चितवन ट्राफिक प्रहरी नछाड्ने न्यौपानेको काज दोलखा ट्राफिक भयो । बागमती प्रदेश प्रहरीको सहमतिमा ट्राफिक प्रहरी बागमतीले सो सरुवा गर्यो । तर हाजिर भएको हप्ता दिन हुन नपाउँदै उनको काज फेरि पूर्वी नवलपरासी भएको छ ।

जबकी न्यौपानेको दरबन्दी कहाँ कहाँ भएको छ तथा उनी चितवन ट्राफिकमा कति सालदेखि कार्यरत रहेका छन् भन्ने बारेमा उनको रेकर्ड हेरेमा प्रष्ट हुन्छ । समाचार स्रोतका अनुसार पूर्व डीआईजीपी ज्ञानेन्द्रबिक्रम महतले उनलाई शुरूदेखि नै संरक्षण गर्दै आएका छन् । हालसम्म पनि उनैको संरक्षण रहेको प्रहरी कै कतिपय कर्मचारीहरु बताउँछन् । तर रिटायर्ड डीआईजीको संरक्षण छ भन्दैमा न्यौपानेलाई नियम कानुन नलाग्ने हो भने न्यौपानेको लागि स्थायी आदेश किन नगर्ने कि अवकाश नभएसम्म चितवन ट्राफिक भनेर यतिबेला प्रहरीभित्रै चर्चा हुने गरेको छ ।

उनले चितवन ट्राफिक बसेर रामनगर जस्तो महङ्गो ठाउँमा ठूलो घर, मारूती जेन कार र महेन्द्रा म्याजिक मात्रै खरिद नगरी क्रसरमा समेत लगानी गरेको कुरा चितवनका ट्राफिक प्रहरी र रामनगरबासीहरूलाई समेत थाहा भएको स्रोतको दावी छ । पूर्व डीआईजी महतको छोराले चितवनमा ठेक्का र सप्लायर्सको व्यापार गर्छन् । त्यो व्यापारको सम्पूर्ण रेखदेख र काम यिनै हवल्दार न्यौपानेले गर्ने हुनाले महतले सधै चितवन ट्राफिक वा वरपर उनलाई राख्ने गरेको स्रोतको भनाई छ ।

समाचार अनुसार अहिले पनि काज रोक्न उनले अनेकौं प्रयास गरे । डीआईजी महतकै सिफारिसमा एआईजीपी निरज शाहीलाई यसमा प्रयोग भएको स्रोतको दावी छ । बागमति प्रदेशका डीआईजी बसन्त लामाले उनको जसरी पनि रमाना गराउने आदेश दिएपछि केही दिन उनी दोलखा त गए तर हप्ता दिन नवित्दै निरज शाहीलाई प्रयोग गरि पूर्वी नवलपरासी ट्राफिक काज गराएको स्रोतको भनाई छ । प्रहरीमा यो भन्दा ठूलो बिडम्वना र मनपरि के हुन सक्छ ? भन्ने प्रश्न उठेको छ ।

त्यसैगरि अर्का सिपाही पवन गिरीको अवस्था पनि यस्तै छ । चितवन जिल्ला प्रहरी कार्यालयको बदनाम र विवादित घुमुवा हुन गिरी । जिल्ला ट्राफिक प्रहरी कार्यालय चितवनमा दरबन्दी भएपनि जिल्ला एसपीको घुमुवा भएर बसेका थिए गिरी । समाचार स्रोतका अनुसार धेरै बदनाम भएको उजुरी परेपछि डीआईजी बसन्त लामाले गिरीलाई घुमुवाबाट हटाएर दरबन्दीमा हाजिर गराउन जिल्ला एसपी नान्तीराज गुरूङलाई आदेश दिएपछि गिरी गीतानगर ट्राफिकमा हाजिर भएका थिए ।

बदनाम भएको कारण डीआईजी लामाकै सहमतिमा ट्राफिकका एसपी शान्ति कोइरालाले गिरीलाई सिन्धुपाल्चोक काज गरे । काज गरेको तीन दिनमा प्रहरी मुख्यालयले गिरीको काज पूर्वी नवलपरासी गर्यो । यी दुई प्रमाण र उदाहरणले थाहा हुन्छ कि प्रहरीको नेतृत्व बदनाम हुने र गर्ने काम कसरी भैरहेको छ । यस्ता अनगिन्ती उदाहरण हुँदै गर्दा आईजीपी थापाले अरू प्रहरीलाई नीति र पारदर्शिताको कुरा र भाषण दिन कसरी सुहाउँला त ?