निरीक्षक तामाङले दिए लाइन, बाराबाट कपडा तस्करी सुचारु

२६ असोज, बारा । इलाका प्रहरी कार्यालय सिम्रौनगढका प्रहरी निरीक्षक सुरेन्द्र तामाङले सिम्रौनगढ नाकाबाट तस्करीको लाइन दिएको खबर छ । निरीक्षक अपूर्व ढुङाना काण्डमा मुछिएपछि दुई नम्बर प्रदेशका तत्कालीन डीआईजी प्रध्दुम्न कार्कीले उनलाई हटाएर प्रदेशबाट सुरेन्द्र तामाङलाई पठाएका थिए ।

तामाङको पछि दरबन्दी नै सिम्रौनगढ भएको थियो । अब उनको सरूवा हुने दिन नजिकिदै गर्दा उनले तस्करीको लाइन चलाएको समाचार स्रोतको दावी छ । स्रोतका अनुसार तस्करहरूले प्रहरी प्रमुखलाई दैनिक ३० हजार र सशस्त्र प्रमुखलाई दैनिक १५ हजारको दरले रकम दिएर तस्करीको लाइन चलाएका छन् ।

तामाङको सेटिङमा तस्करीको लाइन पाउनेहरूमा भोला साह कानु र दीपक साह कानु रहेको समाचार स्रोतले बताएको छ । तस्कर भोला साह स्थानीय नेपाली नै हुन भने दीपक साह कानु भारतीय हुन् । उनी बिहार घोडासान कोइरीगाँउका हुन् ।

प्रहरी सेटिङमा उनीहरूले ठूलो मात्रामा कपडाको तस्करी गरिरहेका छन् । दैनिक दश लाख भन्दा बढीको कपडा उनीहरूले प्रहरी सेटिङमा भन्सार छलि तस्करी गरिरहेको स्रोतको दावी छ ।

तस्करहरूसग निरीक्षक तामाङ आफैले रकमको लेनदेन गर्ने गरेको इप्रकाका एक असईले नाम नबताउने शर्तमा बताए ।