सीमा चौकी फूलबारीका सईसहित १० प्रहरी कारबाहीमा

२६ असोज, कैलाली । पदको दुरुपयोग गर्दै लापर्बाही ढंगले काम गरेको भन्दै एक चौकीमा कार्यरत सबै प्रहरी कारबाहीमा परेका छन् ।धनगढी उप–महानगरपालिका–१४ बहुलियास्थित सीमा प्रहरी चौकी फूलबारीमा कार्यरत सई गोपाल कार्कीसहित १० जना प्रहरीलाई जिल्ला प्रहरी कार्यालय कैलाली तानिएको बताइएको छ ।

सो चौकीमा नयाँ प्रहरी टोलीलाई जिम्मेवारी दिइएको छ । जिल्ला तानिएका १० जनामाथि थप छानबिनका साथै आन्तरिक कारबाही हुने बताइएको छ ।

भदौ २८ गते सोही चौकीमा एक स्थानीय मृत अवस्थामा फेला परेका थिए । सो घटनामा समेत प्रहरीले लापरबाही गरेको ठहर गर्दै ३ प्रहरीलाई कारबाहीको सिफारिस गरिएको थियो ।

केही समयअघि सोही प्रहरी चौकीमा एक थुनुवामाथि कुटपिट गरिएको समेत आरोप लागेपछि उनीहरूलाई जिल्ला झिकाइएको प्रदेश प्रहरी कार्यालयका प्रवक्ता एसएसपी मुकेशकुमार सिंहले जानकारी दिए ।