चीनले पाँच दिनमा ९० लाखको कोरोना परीक्षण गर्ने

२६ असोज, चीन । चीनले पाँच दिनमा पूरै शहरको कोरोना भाइरस परीक्षण गर्ने भएको छ । चीनको चिङ्डाओ नगरले पाँच दिन लगाएर आफ्ना सबै ९० लाख जनसङ्ख्याको कोरोना भाइरस परीक्षण गर्ने भएको हाे । विदेशबाट आएका कोरोना भाइरस संक्रमितहरूको उपचार गर्ने एउटा अस्पतालसँग सम्बन्ध भएका दर्जनौँ मानिसमा सङ्क्रमण देखिएपछि त्यहाँ ठूलो सङ्ख्यामा कोरोना भाइरस परीक्षण गर्न लागिएको छ ।

गत मे महिनामा चीनले एक करोड १० लाख मानिस बसोबास गर्ने र यो विश्वव्यापी महामारीको केन्द्र ठानिएको वुहान शहरमा सम्पूर्ण जनसङ्ख्यामा यसैगरी कोरोना भाइरसको सामूहिक परीक्षण गरिएको थियो। चीनमा कोरोना भाइरस सङ्क्रमण लगभग नियन्त्रणमा आइसकेको बताइन्छ। तर संसारका अन्य धेरै देशमा कोरोना भाइरस तीव्र गतिमा बढिरहेको छ। उनीहरुले विभिन्न चरण र प्रकृतिका लकडाउनका व्यवस्थाहरू गरेका छन्।

चीनको सामाजिक सञ्जालको वेबसाइट वेइबोमा राखिएको एउटा वक्तव्यमा चिङ्डाओ नगरको स्वास्थ्य आयोगले त्यहाँ छ जनामा नयाँ संक्रमण र ६ जना विनालक्षणका संक्रमितहरू भेटिएको उल्लेख गरेको बीबीसी जनाएको छ ।

ती सबै संक्रमितको सम्बन्ध एउटै अस्पतालसँग देखिएको सरकार सञ्चालित सञ्चारमाध्यम ग्लोबल टाइम्सले जनाएको छ। संवाददाताहरूका अनुसार अब कोरोना भाइरस सङ्क्रमणको सापेक्षित रूपमा सानो नै भएपनि नयाँ समूह अथवा क्लस्टर फेला परेमा उक्त इलाकामा सामूहिक परीक्षण गरिने नयाँ रणनीति चीनका अधिकारीहरूले बनाएका छन्।

चीनको राष्ट्रिय स्वास्थ्य आयोगले सोमवार जनाएअनुसार पाँच दिनभित्रै सम्पूर्ण शहरको परीक्षण गरिने भएको छ । शहरका स्वास्थ्यकर्मी र अस्पतालहरूमा नयाँ भर्ना भएका समेत गरी झन्डै १ लाख १४ हजार ८ सय ६२ जनाको कोरोनाभाइरस परीक्षणपछि नेगेटिभ नतिजा आइसकेको चिङ्डाओको स्वास्थ्य आयोगले जनाएको छ।

समाचारका अनुसार परीक्षण केन्द्रहरू बिहान ७ बजेदेखि रातिको ११ बजेसम्म खुला रहने छन् । नयाँ संक्रमितहरू चीनमा सुनौलो साप्ताहिक छुट्टी भनिने अवकाशको समयपछि देखा परेका छन्, जुन समयमा करोडौँ मानिसहरूले देशभरि यात्रा गरेका थिए।

यसअघि वुहानमा १० दिनमा एक करोड १० लाख मानिसमा कोरोना भाइरस परीक्षण गरिएको चीनले जनाएको थियो। बीबीसीको तथ्य परीक्षण एकाइ रीयालिटी चेकले गरेको अनुमानअनुसार त्यस बेला त्यसरी परीक्षण गरिएकाहरूको सङ्ख्या ९० लाख हुनुपर्छ। त्यो सङ्ख्या पनि निकै ठूलो मानिन्छ।

त्यस बेला कोरोनाभाइरस परीक्षणका लागि सयौँ परीक्षण केन्द्रहरू खुला गरिएका थिए र हजारौँ कर्मचारीहरू परिचालित भएका थिए। शारीरिक अपाङ्गता भएका, वयोवृद्ध र अन्य जोखिमपूर्ण समूहमा पर्नेहरूलाई तिनका घरमा नै गएर परीक्षण गरिएको थियो।