अमेरिकामा राष्ट्रपति चुनावका लागी चार करोड भन्दा बढी मत

६ कार्तिक, काठमाडौं । अमेरिकामा राष्ट्रपति चुनावका लागी अहिलेसम्म चार करोड भन्दा बढी मतदाताले आफ्नो मत खसाली सकेको निर्वाचन आयोगलाई उद्धृत गर्दै अमेरिकी सञ्चारमाध्यमले जनाएका छन् ।

अमेरिकामा आउँदो नोभेम्बर ३ मा राष्ट्रपतिसहित आम चुनाव हुँदैछ । राष्ट्रपति चुनावमा हालका रिपब्लिकन राष्ट्रपति डोनाल्ड ट्रम्पलाई डेमोक्र्याटिक उम्मेदवार जो बाइडेनले चुनौति दिएका छन् । पछिल्ला मत सर्वेक्षणहरुमा पूर्व उपराष्ट्रपति समेत रहेका जो बाइडेन अघि देखिएका छन् । तर केही महत्वपूर्ण राज्यहरुमा भने उनको अग्रता साँघुरो छ ।

चुनावका लागि दुई हप्ता कम समय रहेका बेला ४७ राज्य र डिसीबाट प्राप्त भएको तथ्यांक अनुसार हुलाक वा अग्रिम मतदान स्थलमा गएर भोट हाल्नेको संख्या विगतको भन्दा धेरै पुगिसकेको देखिएको छ । सन् २०१६ को चुनावमा १३ करोड ६० लाख मत खसेको थियो । अहिलेसम्म खसेको मत त्यसको झण्डै ३० प्रतिशत हो ।

ट्रम्पले लगातार महत्वपूर्ण राज्यहरुमा भिडभाड युक्त चुनावी सभा गरिरहेका छन् । तुलनात्मक रुपमा अति साना र कोरोना भाइरसको संक्रमण फैलिन नदिनका लागि सुरक्षात्मक चुनावी कार्यक्रम गर्दै आएका बाइडेन भने गएको सोमबारदेखि डेलवरस्थित घरमा छन् ।

उनले नेपाली समय अनुसार शुक्रबार बिहान हुने ट्रम्पसँगको दोस्रो तथा अन्तिम टेलिभिजन बहसको तयारी गरिरहेका छन् । बाइडेनका लागि चुनावी अभियानमा पूर्व राष्ट्रपति बाराक ओबामा सामेल हुन थालेका छन् । यो पटकको चुनावमा अग्रिम मतदान गर्नेको संख्या लगातार बढ्दो क्रममा देखिएको छ।