हाम्रो टीम नेपालद्धारा खुलामञ्चमा ३ सय मजदुरलाई टीका र दक्षिणा

१० कार्तिक, काठमाडौं । हाम्रो टीम नेपालले दशैँको मुख्य दिन सोमबार पनि खुलामञ्चमा ३ सय मजदुरलाई टीका र दक्षिणा लगाइदिएको छ । लकडाउन सुरु भएदेखि सर्वसाधारणलाई निःशुल्क खाना खुवाइरहेको हाम्रो टीम नेपालले दशैँको दिन सर्वसाधारणलाई टीका लगाइदिएको हो ।

कोरोना महामारी र लकडाउनका कारण रोजगारी गुमाएपछि खुलामञ्चमा बाँडिने खाना नियमित खाँदै आइरहेकाहरुलाई सोमबार हाम्रो टीम नेपालले टीका लगाएर दक्षिणा दिएको छ भने मासुभात खुवाएको छ ।

हाम्रो टीम नेपालका संस्थापक अध्यक्ष विमल पन्तले ७ महिनादेखि निरन्तर खुलामञ्चमा खाना खाइरहेकाहरुसँग दसैँ मनाउँदा सन्तुष्टि मिलेको बताए । कोरोना संक्रमणको कारण रोजगारी गुमाएकाहरु रोजगारीमा नफर्किएसम्म निःशुल्क खाना वितरण गरिने उनको भनाइ छ ।