ओली–प्रचण्डबीच फोनवार्ता, भेटवार्ता कहिले ?

१८ कार्तिक, काठमाडौं । लामो तिक्ततापछि नेकपा अध्यक्षद्धय प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच फोनवार्ता भएको छ । शनिबार भएको भेटमा ओलीले पार्टी फुटाउने प्रस्ताव गरेपछि प्रचण्ड रिसाएर खुमलटार फर्केका थिए ।

त्यसयता उनी बालुवाटार गएका छैनन् । ओलीले बोलाउँदा पनि बालुवाटार नगएका प्रचण्डसँग सोमबार फोनवार्ता भएको हो । फोनमा ओलीले प्रचण्डसँग विवाद छाडेर सहमति गरेर अगाडी बढ्नुपर्ने प्रस्ताव गरेका छन् ।

नेकपाका नेताहरुका अनुसार दुई अध्यक्षबीच कुराकानी भएपनि अवस्था संकटकै छ । ओलीले नै पार्टी फुटाउने प्रस्ताव गरेपछि प्रचण्ड आन्तरिक छलफलमा छन् । ओलीको अबको योजना पार्टी फुटाउने र पूर्व माओवादीलाई बालुवाटारबाट खेद्ने योजना रहेकाले त्यसको मुकाबिला गर्न बलियो योजना बनाउनुपर्ने निष्कर्षमा प्रचण्ड पुगेका छन् ।

यसले गर्दा पनि नेकपा विवाद समाधान हुनुको साटो झन बढ्दै गएको छ । जसले कार्यकर्तामा निराशा थपेको छ ।